🌾 जिल्हाधिकारी राहुल कर्डीले यांची खडकूत येथे पीक कापणी प्रयोगाची पाहणी 🌾

नांदेड, दि. ३ ऑक्टोबर : यावर्षापासून पीक विमा योजनेअंतर्गत शेतकऱ्यांना मिळणाऱ्या नुकसान भरपाईच्या रकमेचे निर्धारण करताना पीक कापणी प्रयोग हा मुख्य आधार मानला जाणार आहे. या प्रक्रियेत तांत्रिक त्रुटी टाळण्यासाठी आणि शेतकऱ्यांना योग्य लाभ मिळावा यासाठी जिल्हास्तरावर प्रात्यक्षिक स्वरूपात प्रयोग आयोजित केले जात आहेत.

याच पार्श्वभूमीवर आज जिल्हाधिकारी राहुल कर्डीले यांनी नांदेड तालुक्यातील मौजे खडकूत येथे शेतकरी बालाजी नागुराव कंकाळ यांच्या शेतावर सोयाबीन पिकाच्या कापणी प्रात्यक्षिकाची पाहणी केली.

या वेळी जिल्हाधिकाऱ्यांनी शेतकऱ्यांशी संवाद साधत पीक कापणी प्रयोगाचे महत्त्व, त्याची अंमलबजावणी पद्धत आणि त्यातून मिळणाऱ्या निष्कर्षांचे शेतकऱ्यांच्या हिताशी असलेले नाते स्पष्ट केले. त्यांनी सांगितले की, “शेतकऱ्यांना न्याय्य नुकसान भरपाई मिळावी यासाठी पीक कापणी प्रयोग अत्यंत महत्त्वाचे आहेत. या प्रक्रियेत पारदर्शकता व काटेकोरपणा आवश्यक आहे.”

या प्रात्यक्षिकावेळी जिल्हा अधीक्षक कृषी अधिकारी दत्तकुमार कळसाईत, मंडळ कृषी अधिकारी श्री. सानप, सहाय्यक कृषी अधिकारी श्री. कासटेवाड, श्री. येवते, ग्राम महसूल अधिकारी, भारतीय कृषी विमा कंपनीचे तालुका प्रतिनिधी, ग्रामस्तरीय पीक कापणी समिती सदस्य, पोलीस पाटील, सरपंच, ग्रामपंचायत सदस्य तसेच शेतकरी मोठ्या संख्येने उपस्थित होते.

👉 या उपक्रमामुळे शेतकऱ्यांना पारदर्शक आणि योग्य नुकसान भरपाई मिळण्यास मदत होणार आहे.