नांदेड १७ मार्च प्रतिनिधी माधव वाघमारे
राज्यात गुटखा विक्रीवर बंदी असतानाही छुप्या मार्गाने चालणाऱ्या अवैध व्यवसायांविरुद्ध पोलीस प्रशासनाने आता आक्रमक पवित्रा घेतला आहे. पोलीस उपमहानिरीक्षक श्री. शहाजी उमाप यांनी आयोजित केलेल्या विशेष गुटखा विरोधी मोहिमेच्या पहिल्याच दिवशी (दि. १६ मार्च) नांदेड परिक्षेत्रात मोठी कारवाई करण्यात आली आहे. या मोहिमेत एकूण १३ आरोपींना अटक करण्यात आली असून त्यांच्याकडून १४ लाख ४३ हजार १४९ रुपये किमतीचा गुटखा आणि दोन वाहने जप्त करण्यात आली आहेत.
परिक्षेत्रातील चारही जिल्ह्यांत कारवाईचे सत्र
दिनांक १६ ते ३१ मार्च २०२६ या कालावधीत ही विशेष मोहीम राबविण्यात येत आहे. मोहिमेच्या पहिल्या दिवशी परिक्षेत्रातील चारही जिल्ह्यांत भारतीय न्याय संहिता कलम १२३ अन्वये एकूण ९ गुन्हे दाखल करण्यात आले आहेत. यामध्ये:
- नांदेड, हिंगोली व परभणी जिल्हा: प्रत्येकी २ कारवाया.
- लातूर जिल्हा: ३ कारवाया.
या कारवाईत ताब्यात घेण्यात आलेले बहुतांश आरोपी हे पान टपरी चालक आहेत. त्यांच्याकडून गुटख्यासह इतर तंबाखूजन्य पदार्थ आणि वाहतुकीसाठी वापरली जाणारी दोन वाहने पोलिसांनी ताब्यात घेतली आहेत.
१० वर्षांपर्यंत कारावासाची तरतूद
या संदर्भात महत्त्वाची बाब म्हणजे, कलम १२३ बी.एन.एस. अन्वये करण्यात आलेल्या या कारवाईचा खटला सत्र न्यायालयात चालणार आहे. यामध्ये दोषी आढळल्यास १० वर्षांपर्यंत कारावास आणि द्रव्य दंडाची कठोर शिक्षा होऊ शकते. प्रतिबंधित तंबाखूजन्य पदार्थ, सुगंधी सुपारी, खर्रा, मावा यांची साठवणूक आणि वाहतूक करणाऱ्यांविरुद्ध कडक कारवाई करण्याचे आदेश श्री. शहाजी उमाप यांनी चारही जिल्ह्यांतील पोलीस अधिकाऱ्यांना दिले आहेत.
नागरिकांसाठी ‘खबर’ हेल्पलाईन
आपल्या भागात चालणाऱ्या अवैध व्यवसायांची माहिती पोलिसांपर्यंत सहज पोहोचवण्यासाठी पोलीस उपमहानिरीक्षक कार्यालयाने ‘खबर’ हेल्पलाईन सुरू केली आहे. नागरिक ९१ ५० १०० १०० (91 50 100 100) या मोबाईल क्रमांकावर फोन करून किंवा व्हॉट्सॲप मेसेजद्वारे गुप्त माहिती देऊ शकतात. माहिती देणाऱ्याचे नाव गोपनीय ठेवले जाईल, असे आवाहन पोलीस प्रशासनाकडून करण्यात आले आहे.
