नांदेड : २१ मार्च प्रतिनिधी माधव वाघमारे
जिल्हा पोलीस अधीक्षक श्री. अबिनाश कुमार यांनी चोरी, घरफोडी व दरोड्यासारखे गुन्हे उघडकीस आणण्याचे कडक निर्देश दिले आहेत. या आदेशाची अंमलबजावणी करत भाग्यनगर पोलीस ठाण्याच्या गुन्हे शोध पथकाने अत्यंत कौशल्याने अवघ्या १२ तासांच्या आत चोरीचा गुन्हा उघडकीस आणला असून, १ लाख ८६ हजार रुपयांचा मुद्देमाल जप्त केला आहे.
नेमकी घटना काय?
दिनांक १९ मार्च २०२६ रोजी मध्यरात्री एच.पी. पेट्रोल पंपासमोरून चार हायवा गाड्यांच्या ८ बॅटऱ्या चोरीला गेल्या होत्या. याप्रकरणी भाग्यनगर पोलीस ठाण्यात गु.र.नं. १५४/२०२६ कलम ३०३ (२) बी.एन.एस. प्रमाणे गुन्हा दाखल करण्यात आला होता. घटनेचे गांभीर्य ओळखून पोलीस उपनिरीक्षक विनोद देशमुख व त्यांच्या पथकाने तातडीने तपास चक्राला गती दिली.
असा लागला छडा
तपास सुरू असतानाच गोपनीय बातमीदाराकडून माहिती मिळाली की, एक संशयित तरुण युनिकॉर्न गाडीवर पूर्णा रोड परिसरातील एच.पी. पेट्रोल पंपाजवळ फिरत आहे. पोलीस निरीक्षक संतोष तांबे यांच्या मार्गदर्शनाखाली पथकाने सापळा रचून सदर तरुणाला ताब्यात घेतले. त्याची सखोल चौकशी केली असता, त्याने आपले नाव किरपालसिंग पि शेरसिंग टाक (वय २५ वर्षे, रा. विष्णुनगर, नांदेड) असल्याचे सांगितले. अधिक विश्वासात घेऊन विचारपूस केली असता त्याने गुन्ह्याची कबुली दिली.
जप्त करण्यात आलेला मुद्देमाल
- हायवा गाड्यांच्या ८ बॅटऱ्या: किंमत अंदाजे ९६,०००/- रुपये.
- गुन्ह्यात वापरलेली मोसा (मोटार सायकल): किंमत ९०,०००/- रुपये.
- एकूण जप्त मुद्देमाल: १,८६,०००/- रुपये (१०० टक्के रिकव्हरी).
यांच्या मार्गदर्शनाखाली झाली कारवाई
ही कारवाई पोलीस अधीक्षक मा. श्री. अबिनाश कुमार, अपर पोलीस अधीक्षक मा. श्रीमती अर्चणा पाटील (भोकर), अपर पोलीस अधीक्षक मा. श्री. सुरज गुरव, उपविभागीय पोलीस अधिकारी मा. श्री. रामेश्वर वंजने आणि प्रशिक्षणार्थी पोलीस अधीक्षक मा. श्री. शशांक एन. एम. यांच्या मार्गदर्शनाखाली करण्यात आली.
तपास पथकात भाग्यनगर पोलीस ठाण्याचे पोलीस निरीक्षक संतोष तांबे, पोलीस निरीक्षक (गुन्हे) महेश माळी, पोलीस उपनिरीक्षक विनोद देशमुख यांच्यासह नरेश वाडेवाले, विशाल माळवे, गजानन किडे, मरदोडे, विष्णू मुंडे, राहुल लाटकर, नागनाथ चापके, राजीव घुले, आदनान पठाण आणि अंकुश कांबळे या कर्मचाऱ्यांचा समावेश होता.
या उल्लेखनीय कामगिरीबद्दल पोलीस अधीक्षक अबिनाश कुमार यांनी संपूर्ण पथकाचे विशेष कौतुक केले आहे. या प्रकरणाचा अधिक तपास पोलीस नाईक चंद्रकांत सोनटक्के करत आहेत
