नांदेड जिल्ह्यात घरगुती गॅसचा पुरवठा सुरळीत प्रशासनाचे नागरिकांना पॅनिक बुकिंग न करण्याचे आवाहन

नांदेड | १३ मार्च प्रतिनिधी – माधव वाघमारे
नांदेड जिल्ह्यात सध्या घरगुती गॅस सिलेंडरचा पुरवठा सुरळीतपणे सुरू आहे. त्यामुळे नागरिकांनी कोणतीही भीती बाळगून ‘पॅनिक बुकिंग’ (गरजेपेक्षा जास्त किंवा आगाऊ बुकिंग करू नये, तसेच गॅस एजन्सींच्या बाहेर अनावश्यक गर्दी टाळावी, असे आवाहन जिल्हा प्रशासनाच्या वतीने करण्यात आले आहे.
सध्या सोशल मीडिया किंवा इतर माध्यमांतून पसरणाऱ्या अफवांमुळे अनेक नागरिक घाबरून गॅसची आगाऊ नोंदणी करत असल्याचे चित्र आहे. मात्र, गॅसचा साठा मुबलक असून पुरवठ्यात कोणतीही अडचण नाही, असे जिल्हा पुरवठा विभागाने स्पष्ट केले आहे.
तक्रारींसाठी कंट्रोल रूम व व्हॉटसॲप सुविधा
घरगुती गॅस वितरणावर नियंत्रण ठेवण्यासाठी जिल्हा आणि तालुका स्तरावर विशेष ‘कंट्रोल रूम’ स्थापन करण्यात येत आहेत. नागरिकांना गॅसशी संबंधित काही समस्या असल्यास किंवा गॅसचा गैरवापर व काळाबाजार होत असल्याचे निदर्शनास आल्यास, नागरिकांनी जिल्हाधिकारी कार्यालयाच्या ८६६८२२३३२६ या अधिकृत व्हॉटसॲप चॅटबॉट (Chat Bot) क्रमांकावर तात्काळ तक्रार नोंदवावी, असे आवाहन जिल्हा पुरवठा अधिकारी यांनी केले आहे.
नागरिकांनी अफवांवर विश्वास न ठेवता संयम राखावा, असे प्रशासनाने पुन्हा एकदा ठळकपणे नमूद केले आहे.