प्रतिनिधी : माधव वाघमारे | दिनांक : 16 फेब्रुवारी
नांदेड : भाग्यनगर पोलीस ठाणे हद्दीत घडलेल्या घरफोडीच्या गंभीर गुन्ह्याचा पर्दाफाश करत गुन्हे शोध पथकाने अवघ्या 12 तासांत आरोपींच्या टोळीला अटक केली आहे. या कारवाईत पोलिसांनी 100 टक्के मुद्देमाल हस्तगत करत तब्बल 19 लाख 61 हजार 800 रुपयांचा ऐवज जप्त केला आहे. या उल्लेखनीय कामगिरीमुळे नागरिकांमध्ये पोलीस प्रशासनाबद्दल विश्वास अधिक दृढ झाला आहे.
प्राप्त माहितीनुसार, भाग्यनगर परिसरात घरफोडीची तक्रार दाखल होताच वरिष्ठांच्या मार्गदर्शनाखाली गुन्हे शोध पथक सक्रिय झाले. गोपनीय माहितीच्या आधारे पोलिसांनी तांत्रिक विश्लेषण व सततची चौकशी करत संशयितांचा माग काढला. अखेर आरोपींचा ठावठिकाणा निश्चित करून अवघ्या काही तासांत त्यांना ताब्यात घेण्यात आले.
पोलिसांनी आरोपींकडून रोख रक्कम, सोन्या-चांदीचे दागिने, इलेक्ट्रॉनिक वस्तू, वाहन तसेच चोरीसाठी वापरलेले साहित्य असा मोठ्या प्रमाणात मुद्देमाल जप्त केला आहे. या गुन्ह्यात एकूण पाच आरोपींना अटक करण्यात आली असून त्यांच्यावर संबंधित कलमांखाली गुन्हा दाखल करून पुढील तपास सुरू आहे.
या यशस्वी कारवाईसाठी पोलीस अधीक्षक नांदेड यांनी गुन्हे शोध पथकाचे कौतुक केले असून नागरिकांनीही पोलिसांच्या तत्परतेचे स्वागत केले आहे. शहरात वाढत्या घरफोड्यांना आळा घालण्यासाठी अशाच कडक कारवाया पुढेही सुरू राहतील, असा विश्वास पोलीस प्रशासनाने व्यक्त केला आहे.
