नांदेड, दि. 7 मार्च प्रतिनिधी माधव वाघमारे
दक्षिण मध्य रेल्वेच्या नांदेड विभागाने फेब्रुवारी 2026 महिन्यात राबवलेल्या व्यापक तिकीट तपासणी मोहिमेत मोठे यश मिळवले आहे. विनातिकीट आणि अनियमित प्रवास करणाऱ्यांविरुद्धच्या या मोहिमेत एकूण 23 हजार 51 प्रकरणे उघडकीस आली असून त्यातून तब्बल 1.31 कोटी रुपयांचा महसूल वसूल करण्यात आला आहे. ही कारवाई केवळ महसूल वाढीसाठीच नव्हे, तर प्रामाणिक प्रवाशांना सुरक्षित आणि त्रासमुक्त प्रवास देण्याच्या दृष्टिकोनातून करण्यात आली.
गेल्या वर्षीच्या तुलनेत यंदा कारवाईत लक्षणीय वाढ झाली आहे. फेब्रुवारी 2025 मध्ये जिथे 19 हजार 260 प्रकरणांतून 1.06 कोटी रुपये वसूल करण्यात आले होते, तिथे यंदा वसुलीत 23.58 टक्क्यांची भरघोस वाढ नोंदवण्यात आली आहे.
या मोहिमेदरम्यान आढळलेल्या प्रकरणांचे स्वरूप पुढीलप्रमाणे:
· विनातिकीट प्रवास: 16,758 प्रकरणे
· अनियमित प्रवासी / उच्च श्रेणीत अनधिकृत प्रवास: 4,354 प्रकरणे
· बुकिंग न केलेले सामान: 1,939 प्रकरणे
ही मोहीम यशस्वी करण्यासाठी विभागाने मोठ्या प्रमाणात मनुष्यबळ उभे केले होते. 34 स्क्वॉड कर्मचारी, 167 अॅमेनिटीज कर्मचारी आणि 18 स्टेशनरी कर्मचाऱ्यांसह रेल्वे संरक्षण दल (RPF) च्या जवानांनीही सक्रिय सहभाग नोंदवला. फेब्रुवारी महिन्यात विभागात 13 फोर्ट्रेस तपासण्या व 2 मोठ्या तपासण्या (मॅसिव्ह चेक्स) करण्यात आल्या.
विशेष म्हणजे, 27 फेब्रुवारी रोजी सर्वाधिक कारवाईची नोंद झाली. या एकाच दिवशी तब्बल 1,212 प्रकरणे उघडकीस आली असून 8 लाख 29 हजार 329 रुपयांचा महसूल वसूल करण्यात आला.
तिकीट तपासणीबरोबरच प्रवाशांच्या संख्येतही वाढ झाल्याचे दिसून आले आहे. फेब्रुवारी 2026 मध्ये 2.844 दशलक्ष प्रवाशांनी प्रवास केला, जो गेल्यावर्षीच्या (2.738 दशलक्ष) तुलनेत 3.87 टक्क्यांनी अधिक आहे. यामुळे प्रवासी महसुलात 19.20 टक्क्यांनी वाढ होऊन 46.32 कोटी रुपये महसूल मिळाला आहे.
नांदेड विभागाने सर्व प्रवाशांना वैध तिकीट घेऊन प्रवास करण्याचे आवाहन केले आहे. रेल्वे नियमांचे पालन करून प्रवास केल्यास सर्व प्रवाशांसाठी शिस्त, सुरक्षितता आणि सोयीसुविधा कायम राखता येतील, असे आवाहन विभागाकडून करण्यात आले
