नांदेड :३० डिसेंबर (प्रतिनिधी) माधव वाघमारे शहरातील सार्वजनिक शांतता अबाधित राखण्यासाठी नांदेड पोलीस प्रशासनाकडून सातत्याने कडक पावले उचलली जात आहेत. त्याच अनुषंगाने पोलीस स्टेशन विमानतळ अंतर्गत सार्वजनिक रस्त्यावर आपसात मारामारी करून शांतता बिघडविण्याचा प्रयत्न करणाऱ्या युवकांविरुद्ध कायदेशीर कारवाई करण्यात आली आहे.
माननीय श्री. अबिनाश कुमार, पोलीस अधीक्षक, नांदेड यांच्या मार्गदर्शनाखाली तसेच माननीय श्रीमती अर्चना पाटील, अप्पर पोलीस अधीक्षक, भोकर, माननीय श्री. सुरज गुरव, अप्पर पोलीस अधीक्षक, नांदेड आणि श्री. रामेश्वर व्यंजने, उपविभागीय पोलीस अधिकारी, नांदेड शहर यांच्या निर्देशानुसार ही कारवाई करण्यात आली. पोलीस निरीक्षक श्री. रामदास शेंडगे (पोलीस स्टेशन विमानतळ) यांच्या नेतृत्वाखाली सपोनि श्री. संतोष जोंधळे, तसेच पोलीस कर्मचारी तेलंगे, शेख जावेद, राजू कांबळे, सोमनाथ पत्रे, राजेश माने, शेख टाकलवाड व इतर कर्मचाऱ्यांनी संयुक्तपणे ही कारवाई केली.
पोलीस अधीक्षकांनी यापूर्वीच नांदेड शहरातील बाजारपेठा, गर्दीची ठिकाणे, शाळा-महाविद्यालये व क्लासेस परिसरात सतत पोलीस गस्त ठेवण्याचे आदेश दिले होते. महिलांची छेडछाड करणारे, स्टंटबाजी करणारे तसेच सार्वजनिक शांतता भंग करण्याचा प्रयत्न करणाऱ्या व्यक्तींवर तात्काळ कारवाई करण्याचे स्पष्ट निर्देश सर्व पोलीस ठाणे प्रभारी यांना देण्यात आले होते.
त्या अनुषंगाने दिनांक २६ डिसेंबर २०२५ रोजी सायंकाळी सुमारे ४ वाजता पोलीस स्टेशन विमानतळ हद्दीतील आनंदनगर भागात काही युवकांनी किरकोळ कारणावरून सार्वजनिक रस्त्यावर आपसात मारामारी करून झुंज दिल्याची घटना घडली. या घटनेचा व्हिडिओ सोशल मीडियावर व्हायरल झाल्यानंतर विमानतळ पोलिसांनी तात्काळ दखल घेत तपास सुरू केला.
तपासात सहभागी युवकांची ओळख पटवून त्यांना दिनांक २९ डिसेंबर २०२५ रोजी ताब्यात घेण्यात आले. ताब्यात घेतलेल्या आरोपींमध्ये तनिष्क विनोद राठोड (वय १८, रा. बेलानगर तरोडा, नांदेड), कार्तिक रामदास मालदोडे (वय १९, रा. वैजापूर, ता. मुदखेड, जि. नांदेड), अमन राजेश वाठोरे (वय १८, रा. अंबानगर, सांगवी बुद्रुक, नांदेड), हर्ष सुनील नरवाडे (वय १८, रा. कुर्तडी, ता. कळमनुरी, जि. हिंगोली) यांचा समावेश असून इतर तीन विधीसंघर्षित बालकांचाही यात समावेश आहे.
सार्वजनिक ठिकाणी मारामारी करून शांतता भंग केल्याप्रकरणी संबंधितांविरुद्ध गुन्हा नोंदवून कायदेशीर कारवाई करण्यात आली आहे. कोणत्याही सार्वजनिक ठिकाणी अशा प्रकारची मारामारी, दहशत निर्माण करणारे प्रकार अथवा शांतता बिघडविण्याचा प्रयत्न सहन केला जाणार नाही. असे प्रकार करणाऱ्यांवर कठोर कायदेशीर कारवाई करण्यात येईल, असा सज्जड इशारा नांदेड पोलीस प्रशासनाने नागरिकांना दिला आहे.
