नांदेड दि. 1 ऑक्टोबर : (प्रतिनिधी) इतर मागास बहुजन कल्याण विभागांतर्गत विमुक्त जाती, भटक्या जमाती तसेच विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी शासकीय वसतीगृह योजना सुरु झाली आहे. या योजनेतून प्रवेश मिळालेल्या विद्यार्थ्यांना उच्च शिक्षणासाठी भोजन, निवास व्यवस्था आणि शैक्षणिक साहित्यासाठी थेट आर्थिक सहाय्य आधारसंलग्न बँक खात्यामध्ये जमा केले जाणार आहे.
तसेच, गुणवत्तेनुसार वसतीगृहात प्रवेश न मिळालेल्या पात्र विद्यार्थ्यांचे अर्ज पंडित दिनदयाळ स्वयंम व ज्ञानज्योती सावित्रीबाई फुले आधार योजना अंतर्गत विचारात घेतले जाणार आहेत.
या योजनेसाठी जिल्ह्यातील उच्च शिक्षण घेणारे विद्यार्थी – विद्यार्थीनी, जे बारावी नंतर पदवी किंवा पदव्युत्तर स्तरावरील व्यावसायिक व बिगर व्यावसायिक अभ्यासक्रमाच्या पहिल्या वर्षात प्रवेशित आहेत, ते ऑनलाईन अर्ज करू शकतात. अर्ज भरण्याची अंतिम तारीख 26 ऑक्टोबर 2025 असून इच्छुक विद्यार्थ्यांनी अर्जासाठी https://hmas.mahait.org या संकेतस्थळाला भेट द्यावी, असे आवाहन इतर मागास बहुजन कल्याण विभागाचे सहाय्यक संचालक सचिन खुणे यांनी केले आहे.
👉 विद्यार्थीनींना योजनेचा लाभ घेण्यासाठी अंतिम तारखेपूर्वी अर्ज करण्याचे आवाहन करण्यात आले आहे.
