नांदेड, दि. 12 नोव्हेंबर : (प्रतिनिधी) माधव वाघमारे
शरीराविरुद्ध गंभीर गुन्हे करणाऱ्या दोन इसमांवर किनवट पोलिसांनी कडक कारवाई करत त्यांना सहा महिन्यांसाठी नांदेड जिल्ह्यातून हद्दपार केले आहे. ही कारवाई नांदेडचे पोलीस अधीक्षक श्री. अबिनाश कुमार यांच्या मार्गदर्शनाखाली करण्यात आली.
हद्दपार करण्यात आलेल्या इसमांची नावे पुढीलप्रमाणे आहेत —
1️⃣ शेख फारूक शेख कुर्बान (वय 38 वर्षे, व्यवसाय: मजुरी)
2️⃣ शेख अजीम शेख ओनक (वय 40 वर्षे)
सदर इसमांवर शरीराविरुद्ध गुन्हे दाखल असून, त्यांनी सार्वजनिक शांतता भंग करून परिसरात दहशत निर्माण केली होती. त्यांच्या वर्तनात सुधारणा न झाल्याने, महाराष्ट्र पोलीस कायदा 1951 चे कलम 55 अन्वये त्यांच्यावर प्रतिबंधात्मक कारवाई करण्यात आली.
ही कारवाई माननीय श्री. अबिनाश कुमार, पोलीस अधीक्षक नांदेड, माननीय सौ. अर्चना पाटील, अपर पोलीस अधीक्षक भोकर, तसेच उपविभागीय पोलीस अधिकारी श्री. रामकृष्ण मळगणे (किनवट) यांच्या मार्गदर्शनाखाली करण्यात आली.
किनवट पोलीस ठाण्याकडून सादर करण्यात आलेल्या प्रस्तावास मान्यता देत पोलीस अधीक्षक कार्यालय, नांदेड यांनी दिनांक 6 नोव्हेंबर 2025 रोजी आदेश काढला आहे. त्यानुसार हे दोघे इसम पुढील सहा महिने नांदेड जिल्ह्यात प्रवेश करू शकणार नाहीत.
सदर कारवाईमुळे गुन्हेगार प्रवृत्तीच्या इसमांना इशारा मिळाला असून, जिल्ह्यात कायदा व सुव्यवस्था टिकवून ठेवण्यासाठी पोलिस विभागाची ही धडाडीची कारवाई ठरत आहे.
