नांदेड, दि. 22 सप्टेंबर : राज्यभर 17 सप्टेंबर ते 2 ऑक्टोबर 2025 या कालावधीत राबविण्यात येत असलेल्या “स्वस्थ नारी – सशक्त परिवार” या अभियानाचा नांदेड जिल्ह्यात उत्स्फूर्त प्रतिसाद दिसून येत आहे. महिलांच्या आरोग्य संवर्धनासाठी आयोजित तपासणी शिबिरांत महिला मोठ्या संख्येने सहभागी होत आहेत.
जिल्हाधिकारी कार्यालय परिसरात महिला पतंजली योग समिती, नांदेड यांच्या वतीने नुकतेच योग साधना शिबिरासोबत आरोग्य तपासणी शिबिर घेण्यात आले. श्री. गुरु गोबिंदसिंघजी स्मारक जिल्हा रुग्णालयाच्या वतीने हे शिबिर पार पडले.
जिल्हा शल्य चिकित्सक डॉ. संजय पेरके, अतिरिक्त जिल्हा चिकित्सक डॉ. पांडुरंग पावडे, निवासी वैद्यकीय अधिकारी (बा.सं.) डॉ. राजाभाऊ बुट्टे, एनसीडी नोडल अधिकारी डॉ. हनुमंत पाटील, आरएमओ डॉ. पुष्पा गायकवाड व डॉ. एच.के. साखरे यांच्या मार्गदर्शनाखाली या शिबिरात एकूण ८५ महिलांची आरोग्य तपासणी करण्यात आली. उच्चरक्तदाब, मधुमेह तपासणीसह CBC, LFT, KFT, HBA1C अशा विविध रक्त तपासण्या घेण्यात आल्या.
या उपक्रमासाठी पतंजली योग समिती नांदेडच्या प्रांत संवाद महिला प्रभारी उर्मिला साजने, डॉ. दिपक हजारी, डॉ. वैजवाडे, विजय उदगीरकर, जगन्नाथ अमिलकंठ्वार, विठ्ठल कदम, हनुमंत ढगे, सौ. सुरेखा चिद्रावर यांची उपस्थिती लाभली. शिबिर यशस्वी करण्यासाठी डॉ. विखारुनिसा खान, शिल्पा सोनाळे, रूपा गजभारे, सुवर्णकार सदाशिव व सुरज वाघमारे यांच्या वैद्यकीय टीमने विशेष परिश्रम घेतले.
