नांदेड २१ जानेवारी प्रतिनिधी माधव वाघमारे
नांदेड शहरातील सार्वजनिक ठिकाणी दारू पिऊन गोंधळ घालणाऱ्या व शांतता भंग करणाऱ्या इसमांवर नांदेड पोलीस दलाकडून कडक कारवाई करण्यात येत आहे. पोलीस अधीक्षक मा. श्री. अबिनाश कुमार यांच्या आदेशानुसार व अपर पोलीस अधीक्षक मा. श्री. सरजेराव गुरव यांच्या मार्गदर्शनाखाली नांदेड सिटी स्ट्रीट सेफ्टी ड्राईव्ह अंतर्गत ही कारवाई राबविण्यात आली.
दिनांक १९ व २० जानेवारी २०२६ रोजी शहरातील विविध पोलीस स्टेशन हद्दीत पेट्रोलिंग दरम्यान सार्वजनिक ठिकाणी दारू पिऊन आरडाओरड, शिवीगाळ करून नागरिकांच्या शांततेस बाधा आणणाऱ्या इसमांवर महाराष्ट्र पोलीस कायद्याच्या कलम ११० व ११७ अन्वये गुन्हे दाखल करण्यात आले.
भाग्यनगर पोलीस स्टेशन हद्दीत पेट्रोलिंग दरम्यान पेट्रोल पंप, जिल्हा मेहेर भवन परिसरात दारू पिऊन गोंधळ करणारे इसम मिळून आले. त्यांच्याकडून दारूची बाटली व साहित्य जप्त करण्यात आले असून एकूण दोन इसमांवर कायदेशीर कारवाई करण्यात आली. तसेच परिसरातील वाईन शॉप व हॉटेल्सचीही तपासणी करण्यात आली.
शिवाजीनगर पोलीस स्टेशन हद्दीत विसावा गार्डन, अण्णाभाऊ साठे चौक परिसरात सार्वजनिक शांततेचा भंग करणाऱ्या चार इसमांवर कारवाई करण्यात आली. संबंधित इसमांवर गुन्हे दाखल करून दारू विक्री करणाऱ्या दुकानांची तपासणी करण्यात आली.
वजिराबाद पोलीस स्टेशन हद्दीत बिना नंबर वाहन चालवणाऱ्या एका इसमावर ५०० रुपये दंड आकारण्यात आला. तसेच वजिराबाद परिसरात सार्वजनिक ठिकाणी दारू पिऊन गोंधळ करणाऱ्या नऊ इसमांवर गुन्हे दाखल करण्यात आले. यातील दोन सराईत गुन्हेगारांना प्रतिबंधात्मक कारवाई अंतर्गत कोठडीत ठेवण्यात आले आहे.
दामिनी पथकाकडूनही कारवाई
विसावा गार्डन, वर्की चौक, सराफा लाईन परिसरात दारू पिऊन आरडाओरड करणाऱ्या नऊ इसमांवर शिवाजीनगर व फोर्ट इटवारा पोलीस ठाण्यात गुन्हे दाखल करण्यात आले आहेत.
पोलीस अधीक्षक मा. श्री. अबिनाश कुमार यांनी स्पष्ट शब्दांत इशारा दिला असून, नांदेड शहरातील कोणत्याही सार्वजनिक ठिकाणी दारू पिणे, पिण्यासाठी जागा उपलब्ध करून देणे किंवा सार्वजनिक शांततेचा भंग करणे खपवून घेतले जाणार नाही. नियमांचे उल्लंघन करणाऱ्यांवर यापुढेही कठोर कारवाई करण्यात येईल, असे त्यांनी आवाहन केले आहे.
