प्रतिनिधी/माधव वाघमारे
नांदेड, दि. 23 फेब्रुवारी: दक्षिण मध्य रेल्वेच्या नांदेड विभागाने प्रवाशांच्या सुरक्षेला प्राधान्य देत ‘ऑपरेशन यात्री सुरक्षा’ आणि ‘ऑपरेशन अमानत’ अंतर्गत केलेल्या कारवायांमध्ये उल्लेखनीय यश मिळवले आहे. गेल्या आठवड्यात विविध ठिकाणी केलेल्या कारवाईत रेल्वे संरक्षण बल (RPF) आणि शासकीय रेल्वे पोलिसांनी (GRP) अनेक गुन्हेगारांना अटक करून प्रवाशांची मालमत्ता सुरक्षित केली.
हजूर साहिब नांदेड येथे दोघे अटकेत
दिनांक 18 फेब्रुवारी रोजी RPF/नांदेड आणि GRP/नांदेडच्या संयुक्त पथकाने हजूर साहिब नांदेड रेल्वे स्थानकाच्या प्लॅटफॉर्म क्रमांक 1 वर गस्त घालत असताना दोन संशयितांना प्रवाशांचे सामान चोरण्याच्या प्रयत्नात रंगेहात पकडले. संशयित आरोपींना ताब्यात घेऊन पुढील तपासासाठी GRP/नांदेडकडे सोपवण्यात आले असून त्यांच्याविरुद्ध गुन्हा दाखल करण्यात आला आहे.
छत्रपती संभाजीनगरमध्ये सराईत चोरट्याला बेड्या
त्याच दिवशी छत्रपती संभाजीनगर स्थानकावर RPF पथकाने केलेल्या निगराणीदरम्यान मोठी यश मिळवले. प्लॅटफॉर्म क्रमांक 2 वर उभी असलेली ट्रेन क्र. 16734 (ओखा-रामेश्वरम एक्सप्रेस) येथे एक संशयित फिरत असल्याचे निदर्शनास आले. झडती घेतली असता त्याच्याकडे चोरीचा 9 हजार रुपये किमतीचा मोबाईल फोन आढळून आला. पडताळणी केली असता हा आरोपी सराईत गुन्हेगार असून त्याचा संबंध ट्रेन क्र. 12105 (सीएसएमटी-गोंदिया विदर्भ एक्सप्रेस) मध्ये झालेल्या चोरीच्या प्रकरणाशी असल्याचे उघडकीस आले. या प्रकरणी चाळीसगाव GRP कडे गुन्हा नोंदवण्यात आला असून आरोपीला पुढील कारवाईसाठी त्यांच्याकडे सोपवण्यात आले.
परभणीत महिला आरोपींना अटक
दिनांक 20 फेब्रुवारी रोजी परभणी रेल्वे स्थानकावर ही कारवाई सुरूच होती. ट्रेन क्र. 17618 (नांदेड-सीएसएमटी मुंबई तापोवन एक्सप्रेस) स्थानकावर आल्यानंतर प्रवाशांची गर्दी असताना चोरी करण्याचा प्रयत्न करणाऱ्या दोन महिला आरोपींना RPF ने ताब्यात घेतले. या प्रकरणी GRP/परभणी येथे गुन्हा दाखल करण्यात आला आहे.
‘ऑपरेशन अमानत’: हरवलेली मालमत्ता परत
चोरीच्या घटना रोखण्यासोबतच ‘ऑपरेशन अमानत’ अंतर्गत प्रवाशांचे हरवलेले सामान शोधून परत करण्याची मोहीमही RPF ने यशस्वीपणे राबवली. जालना येथे ट्रेन क्र. 17057 देवगिरी एक्सप्रेसमध्ये एक प्रवाशाचा 13 हजार रुपये किमतीचा मोबाईल फोन राहून गेला होता. RPF च्या सतर्कतेमुळे हा फोन शोधून काढण्यात आला आणि तो त्याच्या योग्य मालकाला परत करण्यात आला. तर नांदेड येथे एका ज्येष्ठ नागरिक प्रवाशाने विसरलेली, 6 हजार रुपये किमतीच्या मौल्यवान वस्तू असलेली बॅग शोधून तिच्या मालकाला सुरक्षित परत केली.
RPF च्या या यशस्वी कारवायांमुळे प्रवाशांमध्ये समाधानाचे वातावरण असून, सुरक्षा यंत्रणेची दक्षता व समन्वय कौतुकास्पद ठरत आहे. सतत चालू असलेल्या या मोहिमांमुळे स्थानकांवर आणि गाड्यांमध्ये चोऱ्यांच्या घटनांमध्ये लक्षणीय घट होण्यास मदत होईल, असा विश्वास रेल्वे प्रशासनाने व्यक्त केला आहे.
प्रवाशांसाठी आवाहन
या यशस्वी कारवायांदरम्यान RPF ने प्रवाशांना सुरक्षित प्रवासासाठी सतर्क राहण्याचे आवाहन केले आहे. प्रवाशांनी आपल्या सामानावर लक्ष ठेवावे, अनोळखी व्यक्तींशी वैयक्तिक माहिती शेअर करू नये आणि प्लॅटफॉर्मवर किंवा गाडीत कुठेही संशयास्पद हालचाली दिसल्यास त्वरित ड्युटीवरील RPF किंवा GRP कर्मचाऱ्यांना किंवा 139 या रेल्वे हेल्पलाइनवर कळवावे. प्रवाशांचे सहकार्य आणि सतर्कता ही त्यांची स्वतःची सुरक्षा सुनिश्चित करण्यासाठी महत्त्वाची आहे.
