नांदेड, दि. १ ऑक्टोबर :
प्रादेशिक हवामानशास्त्र केंद्र, मुंबई यांनी दिलेल्या माहितीनुसार नांदेड जिल्ह्यासाठी १ ते ४ ऑक्टोबर २०२५ या कालावधीसाठी यलो (Yellow) अलर्ट जारी करण्यात आला आहे. या चार दिवसांत जिल्ह्यात तुरळक ठिकाणी ताशी ३० ते ४० किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम पाऊस पडण्याची शक्यता आहे.
या पार्श्वभूमीवर प्रशासनाने सर्व संबंधित यंत्रणा आणि नागरिकांना आवश्यक ती खबरदारी घेण्याचे आवाहन केले आहे.
नागरिकांनी घ्यावयाची काळजी :
- विजांच्या कडकडाटासह पावसाची शक्यता असल्यास बाहेर जाणे टाळावे.
- सुरक्षित इमारतीत आसरा घ्यावा. मोकळ्या जागेत असाल तर सखल जागेत जाऊन गुडघ्यात डोके घालून बसावे.
- घरात असताना विद्युत उपकरणे त्वरित बंद करावीत.
- तारांचे कुंपण, विजेचे खांब व इतर लोखंडी वस्तूंपासून दूर राहावे.
- पाण्यात उभे राहू नये.
करू नये अशा गोष्टी :
- विजांचा कडकडाट सुरू असताना घरातील लँडलाईन फोन, विद्युत उपकरणे, शॉवर किंवा नळांचा वापर करू नये.
- लोखंडी तंबू अथवा शेडमध्ये आश्रय घेऊ नये.
- उंच झाडाखाली किंवा धातूंच्या मनोऱ्याजवळ थांबू नये.
- विजेचा कडकडाट होत असताना उघड्या दारातून अथवा खिडकीतून आकाशाकडे पाहू नये.
हवामान विभागाने दिलेल्या सूचनेनुसार ही नैसर्गिक परिस्थिती धोकादायक ठरू शकते. त्यामुळे नागरिकांनी आवश्यक ती काळजी घेऊन सुरक्षित राहावे, असे प्रशासनाचे आवाहन आहे.
