नांदेड : २४ जानेवारी (प्रतिनिधी) माधव वाघमारे
नांदेड शहरात अवैध दारू विक्री व वाहतुकीविरोधात पोलिसांनी मोठी कारवाई करत 4 लाख 10 हजार 160 रुपयांचा मुद्देमाल जप्त केला आहे. ही कारवाई भाग्यनगर पोलीस ठाण्याच्या हद्दीत करण्यात आली असून दोन आरोपींना अटक करण्यात आली आहे.
नांदेड शहरात सुरू असलेल्या हिंद-दी-चादर या धार्मिक कार्यक्रमाच्या पार्श्वभूमीवर मोठ्या प्रमाणात भाविकांची ये-जा सुरू आहे. या अनुषंगाने जिल्हाधिकारी यांनी मद्यविक्री बंदीचे आदेश दिले असतानाही काही इसम अवैधरीत्या दारूची विक्री व वाहतूक करत असल्याची गोपनीय माहिती पोलिसांना मिळाली.
पोलीस अधीक्षक मा. श्री. अबिनाश कुमार यांच्या मार्गदर्शनाखाली, अपर पोलीस अधीक्षक मा. श्रीमती अर्चना पाटील (भोकर), मा. श्री. सूरज गुरव, तसेच उपविभागीय पोलीस अधिकारी मा. श्री. रामेश्वर व्यंजने यांच्या नेतृत्वाखाली ही कारवाई करण्यात आली.
दि. 23 जानेवारी 2026 रोजी रात्री 10.45 वाजता, भाग्यनगर पोलीस ठाण्याच्या गुन्हे शोध पथकाने सिंगन भवन समोर, सार्वजनिक रोडवर सापळा रचून छापा टाकला. यावेळी अवैध दारूची वाहतूक करणाऱ्यांना रंगेहाथ पकडण्यात आले.
या कारवाईत देशी भिंगरी दारूच्या 302 सीलबंद बाटल्या (किंमत 20,160 रुपये) तसेच वाहतुकीसाठी वापरण्यात आलेला महिंद्रा इलेक्ट्रिक कंपनीचा ऑटो (किंमत 3,90,000 रुपये) असा एकूण 4,10,160 रुपयांचा मुद्देमाल जप्त करण्यात आला.
या प्रकरणी
- एजाज खान जफर खान (वय 50, व्यवसाय मजुरी, सुंदर नगर, नांदेड)
- नितीन किशन गायकवाड (वय 32, व्यवसाय मजुरी, प्रभात नगर, नांदेड)
यांच्याविरुद्ध भाग्यनगर पोलीस ठाण्यात गु.र.नं. 43/2026 अंतर्गत कलम 65(ई), महाराष्ट्र दारूबंदी कायदा नुसार गुन्हा दाखल करण्यात आला आहे.
ही कारवाई पोलीस निरीक्षक संतोष तांबे, पोलीस उपनिरीक्षक विनोद देशमुख, व नरेश वाडेवाले तसेच गुन्हे शोध पथकातील अधिकारी व अंमलदारांच्या संयुक्त प्रयत्नातून यशस्वी झाली. संबंधित अधिकारी व कर्मचाऱ्यांचे पोलीस अधीक्षक मा. श्री. अबिनाश कुमार यांनी अभिनंदन केले आहे.
सदर प्रकरणाचा पुढील तपास भाग्यनगर पोलीस ठाण्याचे पोलीस हवालदार नागनाथ चापके करीत आहेत.
