हदगाव नांदेड २५ जानेवारी (प्रतिनिधी) माधव वाघमारे
हदगाव तहसील कार्यालयात अनुकंपा तत्त्वावर शिपाई पदावर कार्यरत असलेल्या विधवा महिलेचा तिच्याच सुनेने प्रियकर व इतर साथीदारांच्या मदतीने निर्घृण खून केल्याची धक्कादायक घटना उघडकीस आली असून या प्रकरणाने हदगावसह शेजारील उमरखेड तालुक्यात मोठी खळबळ उडाली आहे.
हदगाव शहरातील गौतम नगर येथे राहणाऱ्या कमलाबाई गंगाधर क्षीरसागर (वय ५४) या विधवा होत्या. पतीच्या निधनानंतर त्यांना अनुकंपा तत्त्वावर नोकरी मिळाली होती. त्यांचा एकुलता एक मुलगा मद्यव्यसनामुळे लिव्हर खराब झाल्याने दोन महिन्यांपूर्वीच मरण पावला होता. त्यामुळे घरात सून सुनिता नागेश क्षीरसागर (वय ३५) ही एकटी राहत होती. या पार्श्वभूमीवर सासू-सुनेमध्ये सतत वाद होत असल्याचे परिसरात बोलले जात होते.
पोलिस तपासात समोर आलेल्या माहितीनुसार, सुनेचे बाहेरील व्यक्तीसोबत अनैतिक संबंध असल्याची चर्चा होती. या कारणावरून सासू-सुनेत तणाव वाढला होता. सासूच्या जाचातून सुटका करून घेण्यासाठी सुनिताने आपल्या प्रियकर परमेश्वर किशन वानखेडे (वय २६, रा. वटफळी ता. हिमायतनगर) यांच्या मदतीने सासूचा काटा काढण्याचा कट रचला.
ठरलेल्या नियोजनानुसार दिनांक १० जानेवारी रोजी पहाटे सुमारे २ वाजताच्या सुमारास, गौतम नगर येथील घरामध्ये कमलाबाई गाढ झोपेत असताना सुनिता व तिचा प्रियकर यांनी स्कार्फने गळा आवळून त्यांचा खून केला. प्रारंभी हा मृत्यू संशयास्पद वाटत असताना, पोलिसांनी तपासाची चक्रे वेगाने फिरवली.
घराच्या आसपासचे सीसीटीव्ही फुटेज, मयताच्या मोबाईलचे कॉल डिटेल्स तसेच इतर तांत्रिक पुराव्यांच्या आधारे तपास योग्य दिशेने गेला. तपासात हा खून संगनमताने केल्याचे निष्पन्न झाले. यामध्ये सुनिता नागेश क्षीरसागर, तिचा प्रियकर परमेश्वर किशन वानखेडे, सुनेचा भाऊ अमोल लोभाजी इटकरे (वय ३८, रा. नागापूर ता. उमरखेड) तसेच प्रियकराचा नातेवाईक मित्र अक्षय नारायण कदम (वय २६, रा. निवघा बाजार ता. हदगाव) यांचा सहभाग असल्याचे स्पष्ट झाले.
अनैतिक संबंधात अडथळा निर्माण होत असल्याच्या कारणावरून हा खून करण्यात आल्याचे चौकशीत निष्पन्न झाल्यानंतर पोलिसांनी या सर्व आरोपींना अटक केली आहे. पुढील तपास हदगाव पोलीस करत असून या घटनेने संपूर्ण परिसरात तीव्र संताप व भीतीचे वातावरण निर्माण झाले आहे.
