हुंडाबळीची धक्कादायक घटना छळाला कंटाळून विवाहितेची गळफास लावून आत्महत्या पतीसह सासरच्या ५ जणांवर गुन्हा दाखल

प्रतिनिधी  ७ जुलै परभणी/ पोखर्णी
हुंड्यासाठी सासरच्या लोकांकडून होणाऱ्या सततच्या मानसिक आणि शारीरिक छळाला कंटाळून एका २५ वर्षीय विवाहितेने राहत्या घरात गळफास लावून आत्महत्या केल्याची धक्कादायक घटना नांदेड येथे घडली आहे. आर्शिया दस्तगीर कुरेशी (वय २५ वर्षे) असे मृत विवाहितेचे नाव आहे. या अत्यंत दुर्दैवी प्रकरणी मृत आर्शियाच्या वडिलांनी दिलेल्या फिर्यादीवरून नांदेड पोलिसांनी पतीसह सासरच्या पाच जणांविरुद्ध छळ आणि आत्महत्येस प्रवृत्त केल्याचा गुन्हा दाखल केला आहे.
पोलिसांकडून मिळालेल्या सविस्तर माहितीनुसार, मृत आर्शियाचा विवाह दस्तगीर रसुल कुरेशी याच्याशी झाला होता. लग्नानंतर काही काळ सुरळीत गेल्यानंतर, पती दस्तगीर याला मटणाचा व्यवसाय वाढवण्यासाठी आणि दुकानाच्या विस्तारासाठी पैशांची नड होती. यासाठी सासरच्या मंडळींनी आर्शियाकडे तिच्या माहेरून १ ते दीड लाख रुपये घेऊन येण्यासाठी तगादा लावला होता. आर्शियाच्या वडिलांनी यापूर्वीही मुलीचा संसार सुखाचा व्हावा यासाठी वेळोवेळी आर्थिक मदत केली होती, मात्र सासरच्यांची पैशांची हाव संपली नव्हती.
या आरोपींवर गुन्हा दाखल:
१. दस्तगीर रसुल कुरेशी (पती)
२. रसुल कुरेशी (सासरे)
३. महबुब रसुल कुरेशी (सासू)
४. सुमय्या जिलानी कुरेशी (नणंद)
५. रिझवाना महबुब कुरेशी (नणंद)
माहेरून पैसे आणले नाहीत या कारणावरून पती, सासरे, सासू आणि नणंदांनी संगनमत करून आर्शियाचा छळ सुरू केला. तिला सतत मारहाण करणे, उपाशी ठेवणे आणि “माहेरून पैसे आणले नाही तर इथेच मरून जा” असे टोमणे मारून तिचा छळ केला जात होता. घटना घडली त्या दिवशी म्हणजेच दि. ०४/०७/२०२६ रोजी आर्शियाने माहेरी फोन करून सासरचे लोक जेवण देत नसल्याचे आणि उपाशी ठेवून मारहाण करत असल्याचे रडत रडत सांगितले होते.
त्यानंतर त्याच रात्री ११:०० वाजण्याच्या सुमारास सततच्या जाचाला कंटाळून आर्शियाने घरात गळफास लावून घेतला. तिला तात्काळ शासकीय रुग्णालयात नेण्यात आले, मात्र डॉक्टरांनी तपासून तिला मृत घोषित केले. या प्रकरणी पोलिसांनी गुन्हा दाखल केला असून पुढील तपास पोलीस करत आहेत.
सविस्तर वृत्त: प्रतिनिधी माधव वाघमारे