नांदेड २९ मे (प्रतिनिधी माधव वाघमारे)
नांदेड शहर व जिल्ह्यात कायदा व सुव्यवस्था अबाधित राखण्यासाठी आणि संघटित गुन्हेगारीचे कंबरडे मोडण्यासाठी नांदेड पोलिसांनी ‘ऑपरेशन क्रॅकडाऊन’ अंतर्गत एक अत्यंत मोठी आणि धडक कारवाई केली आहे. दोन वेगवेगळ्या पोलीस ठाण्यांच्या हद्दीत घडलेल्या तीन गंभीर गुन्ह्यांचा छडा लावत, पोलिसांनी तब्बल २४ सराईत आरोपींविरुद्ध ‘मोक्का’ (MCOCA) कायद्यान्वये कडक कारवाई करण्याचे आदेश जारी केले आहेत. या धडक कारवाईमुळे नांदेडमधील गुन्हेगारी जगतात प्रचंड खळबळबळ उडाली आहे.
दोन वेगवेगळ्या टोळ्यांवर ‘मोक्का’चे अस्त्र
नांदेडचे पोलीस अधीक्षक मा. श्री. अबिनाश कुमार यांच्या मार्गदर्शनाखाली ही संपूर्ण प्रक्रिया राबविण्यात आली. भाग्यनगर आणि विमानतळ पोलीस ठाण्याच्या हद्दीत वर्चस्वाच्या वादातून गंभीर गुन्हे घडले होते.
- भाग्यनगर पोलीस ठाणे: दिनांक ०४/०४/२०२६ रोजी कॅनॉल रोडवरील ई-स्क्वेअरजवळ दोन गटांत वर्चस्वाच्या वादातून तिहेरी खून (Triple Murder) ची थरारक घटना घडली होती. याप्रकरणी भाग्यनगर पोलीस ठाण्यात गुन्हा दाखल आहे.
- विमानतळ पोलीस ठाणे दिनांक २६/०४/२०२६ रोजी आरोपींनी आपापसातील वर्चस्वाच्या वादातून गंभीर स्वरूपाचे गुन्हे केले होते.
हे आरोपी स्वतःच्या आर्थिक फायद्यासाठी टोळी बनवून संघटितपणे गंभीर गुन्हे करत असल्याचे तपासात निष्पन्न झाले. न्यायालयाने वेळोवेळी दखल घेऊनही या गुन्हेगारांच्या वर्तनात कोणतीही सुधारणा झाली नव्हती. जामिनावर बाहेर येताच हे आरोपी पुन्हा गंभीर गुन्हे करत होते, ज्यामुळे सर्वसामान्यांचे जनजीवन विस्कळीत झाले होते.
वरिष्ठ अधिकाऱ्यांची मंजुरी आणि कायदेशीर पाऊल
या टोळ्यांच्या वाढत्या गुन्हेगारी कारवायांना पायबंद घालण्यासाठी ‘महाराष्ट्र संघटित गुन्हेगारी नियंत्रण अधिनियम १९९९’ (मोक्का) अन्वये कारवाई करण्याचा प्रस्ताव तयार करण्यात आला होता. मा. पोलीस उप महानिरीक्षक साहेब, नांदेड परिक्षेत्र यांनी या प्रस्तावाला २८ मे २०२६ रोजी मंजुरी दिली.
या २४ आरोपींवर झाली कारवाई
१. दिपक अर्जुन पवार (वय २४, शिवनगर)
२. रोहीत प्रकाश खिल्लारे (वय १९, तानाजीनगर)
३. आकाश गोविंदराव लुळे (वय २४, तानाजीनगर)
४. पप्पू उर्फ लालबा शेषराव गजलवाड (वय २२, गोपाळनगर)
५. राजेश अंकुश पवार (वय २०, तानाजीनगर)
६. अविनाश नारायण चव्हाण (रा. सखूजीनगर)
७. रोशन सुरेश हळदे (वय २२, गोविंदनगर)
८. प्रशीक उर्फ परश्या दिलीप ओढणे (वय २५, संघसेननगर, इतवारा)
९. चंद्रशेखर उर्फ चंध्या देवराव पाईकराव (वय २५, संघसेननगर, इतवारा)
१०. सोहेल उर्फ चिंधी फिरोजखान पठाण (वय २५, बालाजीनगर)
११. मोहम्मद तोफीक शेख संदलजी (वय २५, वजीराबाद)
१२. साईसिंग उर्फ साईलाला दिपकसिंग गहेरवार (वय २६, सिडको)
१३. जयकुमार उर्फ सोनु कैलास राऊत (वय २३, सुमेध नगर)
१४. शाकेर खान रशीद खान (वय ३०, मिल्लत नगर)
१५. शेख शाहरूख उर्फ कबुतर शेख अजगर (वय २९, खुद्देनगर चौरस्ता)
१६. शेख उबेद शेख अजगर (वय २३, मिल्लत नगर)
१७. दिग्‍विजय गणेशराव नारगुडे (वय २२, शामनगर)
१८. मन्मथ वसंतराव मंगरुळे (वय २५, लालवंडी रोड, ता. नायगाव)
१९. नितेश परमेश्वर इंगळे (वय २२, शिवनगर)
२०. गौरव दिपकसिंग गहेरवार (वय ३०, शक्तीनगर)
२१. सय्यद आवेज सय्यद खलील (वय २७, खुद्देनगर चौरस्ता) (मयत)
२२. महंमद अरबाज महंमद फारुख (वय २३, इतवारा) (मयत)
२३. इलियास उर्फ काला इल्तुखान ईस्माईलखान (रा. खुद्देनगर चौरस्ता)
२४. शेख शाहरूख उर्फ हंटर, शेख जाफर (वय ३१, इतवारा)
(टीप: या यादीतील दोन आरोपी मयत आहेत.)
पोलीस प्रशासनाचा धडाका आणि इशारा
हा मोक्का प्रस्ताव यशस्वी करण्यासाठी भाग्यनगर पोलीस ठाण्याचे पोलीस निरीक्षक श्री. संतोष तांबे आणि विमानतळ पोलीस ठाण्याचे पोलीस निरीक्षक श्री. रामदास शेंडगे यांनी विशेष परिश्रम घेतले. त्यांना स्थानिक गुन्हे शाखेचे (LCB) पोलीस निरीक्षक श्री. अतुल भोसले व इतर अधिकारी-अंमलदारांची मोलाची साथ लाभली.
नांदेड जिल्ह्यात गुन्हेगारी खपवून घेतली जाणार नाही. ऑपरेशन क्रॅकडाऊन’ अंतर्गत सराईत आणि संघटित गुन्हेगारांवर MPDA, MCOCA तसेच हद्दपारीसारखी कडक कारवाई करण्यासाठी पोलिसांची विशेष मोहीम (Drive) सुरूच राहील. पोलीस प्रशासन, नांदेड
