नांदेड पोलिसांची धडाकेबाज कारवाई ३६ जिवंत काडतुसांसह तिघांना अटक सव्वा लाखाचा मुद्देमाल जप्त

नांदेड: 12 मार्च प्रतिनिधी माधव वाघमारे
शहरातील झरी खदान परिसरात अवैध शस्त्र विक्रीचा प्रयत्न करणाऱ्या टोळीचा नांदेड ग्रामीण पोलिसांनी पर्दाफाश केला आहे. पोलीस निरीक्षक ओमकांत चिंचोलकर यांच्या नेतृत्वाखालील पथकाने धाडसी कारवाई करत ३६ जिवंत काडतुसे जप्त केली असून, तिघा संशयित आरोपींना गजाआड केले आहे. या कारवाईत एकूण १ लाख ८ हजार रुपयांचा मुद्देमाल जप्त करण्यात आला आहे.
नेमकी घटना काय?
नांदेडचे पोलीस अधीक्षक अबिनाश कुमार यांनी अवैध शस्त्रे आणि काडतुसांची तस्करी करणाऱ्यांविरुद्ध कठोर कारवाईचे आदेश दिले होते. याच पार्श्वभूमीवर, नांदेड ग्रामीण पोलिसांना गुप्त माहिती मिळाली की, काही इसम झरी खदान परिसरात शस्त्रास्त्रांची आणि काडतुसांची खरेदी-विक्री करण्यासाठी येणार आहेत.
मिळालेल्या माहितीची खात्री करून पोलीस पथकाने तातडीने सापळा रचून झरी खदान परिसरात धाड टाकली. या कारवाईत पोलिसांनी शौनिक गुलाब शिंदे (वय १९), जावेद रहेमत शेख (वय २०) आणि आनंद ऊर्फ चिन्टू सरदार यादव (वय २४) या तिघांना ताब्यात घेतले, तर एक आरोपी घटनास्थळावरून पळून जाण्यात यशस्वी झाला.
असा झाला पर्दाफाश
आरोपींची अंगझडती घेतली असता, त्यांच्याकडे पितळी आणि तांब्या धातूची ३६ जिवंत काडतुसे (HPM PPU 32 AUTO) मिळून आली. प्रत्येक काडतुसाची किंमत ३ हजार रुपये असून, जप्त करण्यात आलेल्या एकूण मुद्देमालाची किंमत १ लाख ८ हजार रुपये आहे.
पोलीस पथकाचे अभिनंदन
ही धडाकेबाज कामगिरी पोलीस अधीक्षक अबिनाश कुमार, अपर पोलीस अधीक्षक अर्चना पाटील, अपर पोलीस अधीक्षक सुरज गुरव आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली पार पडली.
पोलीस निरीक्षक ओमकांत चिंचोलकर, उपनिरीक्षक व्यंकट कुसमे आणि त्यांच्या विशेष पथकातील अंमलदारांनी ही कारवाई यशस्वी केली. या धाडसी कामगिरीबद्दल पोलीस अधीक्षक अबिनाश कुमार यांनी या संपूर्ण पथकाचे कौतुक केले आहे.
सध्या हे आरोपी ही काडतुसे कोठून आणली, कोणाला विकणार होते आणि या रॅकेटमध्ये अजून कोण सामील आहे, याचा अधिक तपास पोलीस उपनिरीक्षक बाबूराव चव्हाण करत आहेत.
या प्रकरणाचा तपास सुरू असून पोलीस पुढील सूत्रे हलवत आहेत.