नांदेड, दि. 3 जानेवारी 2026 (प्रतिनिधी) माधव वाघमारे
नांदेड शहरातील सार्वजनिक ठिकाणी दारू पिऊन शांततेचा भंग करणाऱ्यांविरोधात नांदेड पोलिसांनी कडक पावले उचलली असून सिटी स्ट्रिट सेफ्टी ड्राइव्ह अंतर्गत शहर व परिसरात व्यापक कारवाई करण्यात आली आहे. पोलीस अधीक्षक मा. श्री. अविनाश कुमार यांच्या निर्देशानुसार 1 व 2 जानेवारी 2026 रोजी ही विशेष मोहीम राबविण्यात आली.
या मोहिमेत शहरातील विविध पोलीस स्टेशन हद्दीत पेट्रोलिंग दरम्यान दारू पिऊन सार्वजनिक ठिकाणी गोंधळ घालणाऱ्या एकूण 13 इसमांवर महाराष्ट्र पोलीस कायद्यान्वये गुन्हे दाखल करण्यात आले आहेत. तसेच अवैधरीत्या सुरू असलेल्या दारू विक्री व मद्यपान करणाऱ्या ठिकाणांची तपासणी करण्यात आली.
पोलीस स्टेशन भाग्यनगर हद्दीत पेट्रोलिंग दरम्यान दारूचे साहित्य विक्री करताना तीन इसम आढळून आले. त्यांच्यावर कलम 68 महाराष्ट्र पोलीस कायद्यान्वये गुन्हा दाखल करण्यात आला. यासोबतच परिसरातील दारूची दुकाने, वाईन शॉप व हॉटेल्सची तपासणी करण्यात आली.
पोलीस स्टेशन वजिराबाद हद्दीत मल्लेप्पा हायस्कूल परिसरात सार्वजनिक ठिकाणी मद्यपान करून शांततेचा भंग करणारा एक इसम मिळून आला. त्याच्यावर कलम 110/117 महाराष्ट्र पोलीस कायद्यान्वये कारवाई करण्यात आली. तसेच वजिराबाद चौक येथे एक फटाका बुलेट मोटारसायकल आढळून आल्याने वाहनावर 5 हजार रुपयांचा दंड ठोठावण्यात आला.
पोलीस स्टेशन नांदेड ग्रामीण हद्दीत एमआयडीसी गोपाळचावडी परिसरात दारू पिऊन गोंधळ घालणारे तीन इसम आढळून आले. त्यांच्यावर कलम 110/117 म.पो.का. अंतर्गत कारवाई करण्यात आली.
पोलीस स्टेशन विमानतळ हद्दीत शिवमंदिर रोड परिसरात सार्वजनिक ठिकाणी मद्यपान करणारा एक इसम सापडला. त्याच्यावरही कलम 110/117 अंतर्गत गुन्हा दाखल करण्यात आला असून परिसरातील हॉटेल्स व वाईन शॉपची तपासणी करण्यात आली.
तसेच दामिनी पथकाने विसावा गार्डन व बर्की चौक परिसरात कारवाई करत दारू पिऊन सार्वजनिक शांततेचा भंग करणाऱ्या पाच इसमांवर शिवाजीनगर व इतवारा पोलीस ठाण्यात गुन्हे दाखल केले आहेत.
पोलीस अधीक्षक मा. श्री. अबिनाश कुमार यांनी नागरिकांना आवाहन केले आहे की, सार्वजनिक ठिकाणी दारू पिणे, गोंधळ घालणे किंवा शांततेचा भंग करणे सहन केले जाणार नाही. अशा प्रकारच्या कृत्यात सहभागी आढळल्यास संबंधितांवर कठोर कायदेशीर कारवाई करण्यात येईल, असा इशाराही त्यांनी दिला आहे.
