प्रतिनिधी: माधव वाघमारे
नांदेड/परभणी, दि. १ फेब्रुवारी: नांदेड परिक्षेत्रातील अवैध व्यवसायांवर कारवाई करण्याच्या सूचना पोलीस उपमहानिरीक्षक शहाजी उमाप यांनी दिल्या होत्या. यानुसार कारवाई करताना पोलीस पथकाने नांदेड शहरातील मटका बुक्कीवर छापा टाकून सात जणांना अटक केली तर परभणी जिल्ह्यातील एका जुगार अड्ड्यावर छापा टाकून अठरा जणांना ताब्यात घेतले आहेत. या दोन्ही कारवायांमध्ये एकूण २५ जणांविरुद्ध गुन्हे दाखल करण्यात आले आहेत.
भाग्यनगरमध्ये मटका बुक्कीवर कारवाई
पहिली कारवाई दिनांक २७ फेब्रुवारी रोजी नांदेड शहरातील भाग्यनगर पोलीस ठाण्याच्या हद्दीत करण्यात आली. छत्रपती चौकातील आर.एम.आर. कॉम्प्लेक्समध्ये पोलिसांनी छापा टाकून मटका बुक्कीवर कारवाई केली. या ठिकाणाहून पोलिसांनी २४,३३० रुपयांची रोकड, ३० हजार रुपये किंमतीचे ४ मोबाईल, १० हजार रुपयांचा लेनोवो कंपनीचा टॅब आणि १५ हजार रुपयांचे इतर साहित्य असा एकूण ७९,३३० रुपयांचा मुद्देमाल जप्त केला. या प्रकरणी ७ आरोपींना अटक करण्यात आली असून, त्यांच्याविरुद्ध भाग्यनगर पोलीस ठाण्यात गुन्हा क्रमांक १०६/२०२६ अन्वये महाराष्ट्र जुगार कायद्याच्या कलम ४, ५, १२ (अ) अन्वये गुन्हा नोंदवण्यात आला आहे. या गुन्ह्याचा तपास भाग्यनगर पोलीस ठाण्याचे सपोउपनि रावसाहेब जाधव करत आहेत.
लिमला येथील क्रिडा मंडळावर छापा, जुगार खेळताना १८ जण ताब्यात
दुसरी मोठी कारवाई आज दिनांक २८ फेब्रुवारी रोजी दुपारी साडेतीन वाजताच्या सुमारास परभणी जिल्ह्यातील ताडकळस पोलीस ठाण्याच्या हद्दीत करण्यात आली. मौजे लिमला येथील राजकला क्रिडा व सांस्कृतिक मंडळ येथे पोलिसांनी छापा टाकला. यावेळी तेथे जुगार खेळताना आढळलेल्या १८ आरोपींना पोलिसांनी ताब्यात घेतले. त्यांच्याकडून २०,९०० रुपयांची रोकड आणि २ मोबाईल फोन हस्तगत करण्यात आले आहेत.
तपासात हे क्रिडा मंडळ मूळचे बीड जिल्ह्यातील वडवणी तालुक्यातील चिंचवडगाव येथे नोंदणीकृत असल्याचे उघडकीस आले. या मंडळाची प्रशिक्षण शाखा लिमला येथे चालवल्याचे मॅनेजर कैलास शिंदे यांनी सांगितले. मात्र, संबंधित अभिलेख ते पोलिसांना दाखवू शकले नाहीत. अधिक तपासात या जुगार अड्ड्यावर देशी दारू आणि तंबाखूजन्य पदार्थही विक्रीसाठी उपलब्ध असल्याचे आढळून आले.
याप्रकरणी आरोपींविरुद्ध मुंबई जुगार कायदा कलम ४, ५, मुंबई दारूबंदी अधिनियम कलम ६५ (इ) तसेच सिगारेट आणि इतर तंबाखूजन्य उत्पादने कायदा २०२३ चे कलम ६ (ब) व २४ अन्वये गुन्हा नोंद करण्यात आला आहे. या गुन्ह्याचा पुढील तपास ताडकळस पोलीस ठाण्याचे पोलीस उपनिरीक्षक सतीश तावडे करत आहेत.
पोलिसांचे नागरिकांना आवाहन
या कारवाईत पोलीस उपनिरीक्षक पंकज इंगळे, पोहेकॉ प्रदीप खानसोळे, पोहेकॉ संजीव जिंकलवाड, पोकॉ गणेश धुमाळ आणि पोकॉ कामाजी गवळी यांनी सहभाग घेतला. पोलीस उपमहानिरीक्षक श्री शहाजी उमाप यांनी या कारवाईबद्दल पथकातील अधिकारी आणि कर्मचाऱ्यांचे अभिनंदन केले आहे.
दरम्यान, नागरिकांनी आपल्या भागातील अवैध व्यवसायांची माहिती त्वरित जवळच्या पोलीस ठाण्यात किंवा nandedrange.mahapolice.gov.in या संकेतस्थळावर तसेच ‘खबर’ हेल्पलाइन क्रमांक 91 50 100 100 वर कळवून अशा गोष्टींचा बिमोड करण्यास सहकार्य करावे, असे आवाहन पोलीस उपमहानिरीक्षक शहाजी उमाप यांनी केले आहे.
