नांदेड रेल्वे स्थानकावर कर्मचाऱ्यांचे समुपदेशन प्रवासी सेवांच्या गुणवत्तेत होणार सुधारणा

नांदेड 12 मार्च प्रतिनिधी: माधव वाघमारे
दक्षिण मध्य रेल्वेच्या नांदेड विभागात प्रवाशांना मिळणाऱ्या सेवांची गुणवत्ता अधिक सक्षम करण्यासाठी रेल्वे प्रशासनाने कंबर कसली आहे. याच अनुषंगाने, ऑन बोर्ड हाऊसकीपिंग सर्व्हिस (OBHS) आणि बेडरोल वितरणाशी संबंधित कर्मचाऱ्यांसाठी विशेष समुपदेशन सत्रांचे आयोजन करण्यात येत आहे. या उपक्रमामुळे प्रवाशांना अधिक दर्जेदार आणि सुविधापूर्ण प्रवास अनुभव देणे शक्य होणार आहे.
हजूर साहिब नांदेड रेल्वे स्थानकावर आयोजित या संयुक्त सत्रांमध्ये कर्मचाऱ्यांना त्यांच्या कामाचे महत्त्व आणि व्यावसायिकतेचे धडे देण्यात आले. ‘प्रवासी प्रथम’ हे ब्रीदवाक्य समोर ठेवून, प्रवाशांशी नम्रपणे संवाद साधणे, त्यांच्या तक्रारींचे तातडीने निराकरण करणे आणि डब्यांची स्वच्छता उच्च दर्जाची राखणे याबाबत कर्मचाऱ्यांना सविस्तर मार्गदर्शन करण्यात आले.
सेवा गुणवत्तेवर विशेष भर
रेल्वेच्या वतीने सांगण्यात आले की, ही समुपदेशन सत्रे केवळ औपचारिकता नसून, ती नियमितपणे आयोजित केली जात आहेत. विशेषतः सचखंड एक्सप्रेससारख्या महत्त्वाच्या आणि प्रतिष्ठित गाड्यांच्या प्रस्थानापूर्वी कर्मचाऱ्यांमध्ये प्रभावी समन्वय राखण्यासाठी या सत्रांचा मोठा उपयोग होत आहे. वेळेत सेवा देणे आणि कर्तव्याची जबाबदारी ओळखून काम करणे, या गोष्टींवर विशेष भर देण्यात आला आहे.
नांदेड विभागाच्या या पुढाकारामुळे कर्मचाऱ्यांमधील संघभावना वाढीस लागली असून, याचा थेट सकारात्मक परिणाम रेल्वेच्या प्रवासी सेवांवर दिसून येत आहे. सुरक्षित आणि आरामदायी प्रवासासाठी नांदेड रेल्वे विभाग कटीबद्ध असल्याचे या उपक्रमातून पुन्हा एकदा अधोरेखित झाले आहे.