नांदेड, दि. १ ऑक्टोबर : छत्रपती शिवाजी महाराज महसूल अभियानांतर्गत राबविण्यात येणाऱ्या ‘सेवा पंधरवडा’ उपक्रमाच्या निमित्ताने नांदेड आणि अर्धापूर तालुक्यातील भटक्या विमुक्त जातीतील नागरिकांना विविध दाखले वाटपाचा कार्यक्रम आयोजित करण्यात आला. हा उपक्रम उपविभागीय कार्यालयाच्या सभागृहात पार पडला.
नांदेड उपविभागीय अधिकारी कार्यालय व तहसील कार्यालयाच्या वतीने नागरिकांच्या समस्या सोडवून त्यांना आवश्यक असलेले दाखले उपलब्ध करून देण्यासाठी विशेष उपक्रम राबवले जात आहेत. त्याचाच एक भाग म्हणून हा कार्यक्रम घेण्यात आला होता.
कार्यक्रमात भटक्या विमुक्त जातीचे नेते देविदास हादवे यांनी समाजाच्या समस्या आणि अडचणी मांडल्या. यानंतर उपविभागीय अधिकारी डॉ. सचिन खल्लाळ आणि तहसीलदार संजय वारकड यांच्या हस्ते भटक्या विमुक्त जातीतील नागरिकांना जातीचे प्रमाणपत्र, रेशनकार्ड, रहिवासी दाखला आणि इतर आवश्यक दाखले वाटप करण्यात आले. या कार्यक्रमात वासुदेव, मसणजोगी, मुस्लिम मदारी, गाडीवडार, वाघे, गोसावी आणि गोंधळी समाजातील सुमारे १५० नागरिक उपस्थित होते.
यावेळी, सेतू केंद्रामार्फत उत्कृष्ट कार्य केल्याबद्दल नांदेडचे विजय जोंधळे आणि अर्धापूरचे शिवप्रसाद पत्रे यांचा उपविभागीय अधिकारी डॉ. खल्लाळ यांच्या हस्ते प्रशस्तिपत्र देऊन गौरव करण्यात आला. वाडी तांड्यावरील तसेच वस्तीबाहेर राहणाऱ्या भटक्या विमुक्त समाजांना शासनाच्या विविध योजना लाभ मिळवून देण्यासाठी प्रशासन कटिबद्ध असल्याचे डॉ. खल्लाळ यांनी सांगितले.
या कार्यक्रमाला परभणी जिल्हा कोषागार अधिकारी निळकंठ पांचगे, नायब तहसीलदार संजय नागमवाड, सुनील माचेवाड, स्वप्नील दिगलवार, तसेच पुरवठा निरीक्षक रवींद्र राठोड यांच्यासह अनेक मान्यवर उपस्थित होते.
