नांदेड | प्रतिनिधी : माधव वाघमारे | दि. १६ फेब्रुवारी २०२६
शहराचा कार्यभार स्वीकारल्यानंतर महापालिकेच्या विविध सेवांचा प्रत्यक्ष पाहणीद्वारे आढावा घेण्याचा धडाका नांदेड-वाघाळा शहर महानगरपालिकेच्या नवनियुक्त कविता संतोष मुळे यांनी सुरूच ठेवला आहे. याच अनुषंगाने सोमवारी (दि. १६ फेब्रुवारी २०२६) महापौरांनी शहराच्या पाणीपुरवठा व्यवस्थेचा आढावा घेण्यासाठी काबरानगर जलशुद्धीकरण केंद्राला प्रत्यक्ष भेट देऊन सविस्तर पाहणी केली.
या पाहणीदरम्यान महापौरांनी पाणी शुद्धीकरणाची संपूर्ण प्रक्रिया, पाणीपुरवठ्याची साखळी, जलशुद्धीकरण केंद्रातील यंत्रसामग्री, गाळ उपसण्याची पद्धत तसेच साठवणूक टाक्यांची सद्यस्थिती यांची सखोल माहिती घेतली. शहरवासीयांना स्वच्छ, सुरक्षित आणि मुबलक पाणी मिळावे यासाठी जलशुद्धीकरण केंद्रांची नियमित स्वच्छता, देखभाल व कार्यक्षम संचालन करण्याच्या स्पष्ट सूचना त्यांनी प्रशासनाला दिल्या.
पाणीपुरवठा विभागांतर्गत प्रलंबित कामांचा आढावा घेताना महापौरांनी विशेषतः काबरानगर ते देगलूर नाका दरम्यानच्या मुख्य जलवाहिनीतील गळती दुरुस्ती, तसेच इतर तांत्रिक अडचणींबाबत अधिकाऱ्यांकडून सविस्तर अहवाल मागवला. पाणीपुरवठा व्यवस्थेतील त्रुटी तातडीने दूर करून नागरिकांना कोणत्याही तक्रारीविना नियमित पाणीपुरवठा होईल, याची दक्षता घेण्याचे निर्देशही त्यांनी यावेळी दिले.
या पाहणीप्रसंगी सभागृह नेते महेश कनकदंडे, महापौर प्रतिनिधी संतोष मुळे, शहर अभियंता सुमंत पाटील, उपअभियंता खुशाल कदम, कनिष्ठ अभियंता राजकुमार बोडके, पंप ऑपरेटर मंगेश देशमुख, संतोष गुमलवार यांच्यासह पाणीपुरवठा विभागाचे अधिकारी व कर्मचारी मोठ्या संख्येने उपस्थित होते.
