नांदेड, दि. 19 डिसेंबर (प्रतिनिधी) माधव वाघमारे नांदेड वाघाळा शहर महानगरपालिका सार्वत्रिक निवडणूक 2025-26 चा कार्यक्रम जाहीर झाल्याने शहरात 15 डिसेंबर 2025 पासून आदर्श आचारसंहिता अंमलात आली आहे. महानगरपालिका निवडणूक प्रक्रिया शांततेत, निर्भय व न्याय्य वातावरणात पार पडावी, या उद्देशाने प्रशासनाने प्रतिबंधात्मक आदेश लागू केले आहेत.
निवडणूक काळात आंदोलन, मोर्चा, धरणे, आमरण उपोषण, आत्मदहन यांसारख्या प्रकारांमुळे कायदा व सुव्यवस्थेचा प्रश्न निर्माण होण्याची शक्यता लक्षात घेता, भारतीय नागरीक सुरक्षा संहिता 2023 च्या कलम 163 अन्वये हे आदेश निर्गमित करण्यात आले आहेत. हे प्रतिबंधात्मक आदेश 19 डिसेंबर 2025 रोजी सकाळी 6 वाजल्यापासून ते 16 जानेवारी 2026 च्या मध्यरात्रीपर्यंत लागू राहणार आहेत.
या आदेशांनुसार जिल्हाधिकारी कार्यालय, जिल्हा परिषद, नांदेड वाघाळा महानगरपालिका, तहसील कार्यालय नांदेड तसेच नांदेड शहरातील इतर सर्व शासकीय कार्यालये आणि सार्वजनिक ठिकाणांच्या परिसरात कोणत्याही प्रकारचे आंदोलन, मोर्चा, धरणे, आमरण उपोषण, आत्मदहन किंवा तत्सम कार्यक्रम घेण्यास मनाई करण्यात आली आहे.
सदर प्रतिबंधात्मक आदेश पोलीस अधीक्षक अभिनाश कुमार यांनी निर्गमित केले असून, आदेशाचे उल्लंघन करणाऱ्यांविरोधात कायदेशीर कारवाई करण्यात येणार असल्याचा इशाराही प्रशासनाकडून देण्यात आला आहे. नागरिकांनी प्रशासनाला सहकार्य करून निवडणूक प्रक्रिया शांततेत पार पाडण्यास मदत करावी, असे आवाहन करण्यात आले आहे.
