नांदेड, दि. १८ डिसेंबर (प्रतिनिधी) माधव वाघमारे जिल्ह्यातील नगरपरिषद व नगरपंचायत निवडणुका शांततेत, निर्भय व न्याय्य वातावरणात पार पडाव्यात, यासाठी जिल्हा प्रशासनाकडून कडक प्रतिबंधात्मक उपाययोजना राबविण्यात येत आहेत. धर्माबाद, कुंडलवाडी, मुखेड, भोकर, किनवट व लोहा या नगरपरिषद/नगरपंचायत क्षेत्रात मतदानाच्या दिवशी सर्व मतदान केंद्रांच्या परिसरात २०० मीटरच्या आतील भागात विविध निर्बंध लागू करण्यात आले आहेत.
या आदेशानुसार मतदान केंद्र परिसरात सर्व पक्षकारांचे मंडप, तात्पुरती दुकाने, फेरीवाले, तसेच मोबाईल फोन, कॉडलेस फोन, पेजर, वायरलेस सेट, ध्वनीक्षेपक व अन्य इलेक्ट्रॉनिक उपकरणे वापरण्यास मनाई करण्यात आली आहे. निवडणूक कामाव्यतिरिक्त खाजगी वाहनांना प्रवेश बंदी असेल. याशिवाय संबंधित राजकीय पक्षांची चिन्हे, प्रचार साहित्य किंवा घोषणांचे प्रदर्शन करण्यास तसेच निवडणूक कामाशी संबंधित नसलेल्या व्यक्तींना मतदान केंद्र परिसरात प्रवेशास प्रतिबंध राहणार आहे.
हा आदेश भारतीय नागरिक सुरक्षा संहिता २०२३ च्या कलम १६३ अन्वये जिल्हादंडाधिकारी राहुल कर्डिले यांनी निर्गमित केला आहे. नांदेड जिल्ह्यातील धर्माबाद, कुंडलवाडी, मुखेड, भोकर, किनवट व लोहा या नगरपरिषद/नगरपंचायत निवडणूक २०२५ च्या अनुषंगाने हा आदेश मतदानाच्या दिवशी शनिवार, २० डिसेंबर २०२५ रोजी मतदान सुरू झाल्यापासून मतदान प्रक्रिया पूर्ण होईपर्यंत अंमलात राहणार आहे.
जिल्हा प्रशासनाने नागरिक, राजकीय पक्षांचे पदाधिकारी व कार्यकर्ते यांनी या आदेशाचे पालन करून शांततेत लोकशाही प्रक्रियेत सहकार्य करावे, असे आवाहन केले आहे. कायदा व सुव्यवस्था भंग करणाऱ्यांविरोधात कठोर कारवाई करण्यात येईल, असा इशाराही प्रशासनाने दिला आहे.
