नांदेड शहरात वाहतूक शाखेची धडक कारवाई

नांदेड, दि. 21 नोव्हेंबर : (प्रतिनिधी) माधव वाघमारे
शहरातील वाढत्या वाहतूक कोंडीसह अवैध प्रवासी वाहतूक, बिनपरवाना वाहनचालक, तसेच रस्त्यांवरील नियमभंग करणाऱ्या वाहनचालकांवर कठोर कारवाई करण्याच्या सूचना पोलीस अधीक्षक श्री. अबिनाश कुमार यांनी दिल्यानंतर शहर वाहतूक शाखेकडून मोठी मोहिम राबविण्यात आली.

दि. 20.11.2025 रोजी प्रभारी अधिकारी श्री. जगन पवार, पोलीस निरीक्षक, शहर वाहतूक शाखा, इटवारा यांच्या मार्गदर्शनाखाली दंगल नियंत्रण पथक व पोलीस अंमलदार यांच्या टीमने शंकरपट जुना मोंढा, हनुमान टॉकीज, हेडगेवार रोड व बिक्की स्टार परिसरात विशेष तपासणी मोहीम राबवली.
तपासणीदरम्यान वाहनचालकांना वाहतूक नियमांची माहिती देत ज्या वाहनांमध्ये नियमभंग आढळला त्यांच्यावर त्वरित दंडात्मक कारवाई करण्यात आली. या मोहिमेत आतापर्यंत 80 हून अधिक प्रकरणांवर कारवाई झाल्याचे पोलीस प्रशासनाने सांगितले.

वाहतूक शाखेच्या अहवालानुसार—
• अवैध प्रवासी वाहतूक करणारी वाहने,
• परवाना/परमिट नसलेली वाहने,
• रोडवर फळगाड्या व इतर वाहनांद्वारे केलेले अतिक्रमण,
• चुकीच्या ठिकाणी पार्किंग,
• सिग्नल उल्लंघन,
• वाहतूक अडथळा निर्माण करणारी कोणतीही कृती

यांवर कडक कारवाई करण्यात आली.

पोलिसांनी स्पष्ट केले की, कोणतेही फळगाडे किंवा वाहने रस्त्यावर अडथळा निर्माण करणार नाहीत, तसेच सिग्नलचे पालन न करणाऱ्यांवरही कठोर दंड आकारला जाईल. शहरातील वाहतूक सुरळीत ठेवण्यासाठी नागरिकांनी सहकार्य करावे, असे आवाहन करण्यात आले.

ही मोहीम पोलीस अधीक्षक श्री. अबिनाश कुमार, अपर पोलीस अधीक्षक श्री. सूरज गुरव यांच्या मार्गदर्शनाखाली राबविण्यात आली.