विशेष बातमी प्रतिनिधी – माधव वाघमारे
नांदेड १० ऑगस्ट जिल्ह्यात घडलेल्या तीन वेगवेगळ्या गंभीर गुन्ह्यांमध्ये नांदेड पोलिसांनी अत्यंत तत्परता दाखवत जलद गतीने कारवाई केली आहे. पोलीस अधीक्षक डॉ. नीलाभ रोहन यांच्या थेट मार्गदर्शनाखाली स्थानिक गुन्हे शाखा आणि पोलीस ठाण्यांच्या पथकांनी अवघ्या काही तासांत आरोपींच्या मुसक्या आवळल्या आहेत.
१. नांदेड ग्रामीण खुनाचा छडा; ५ आरोपी ताब्यात नांदेड ग्रामीण हद्दीतील धनेगाव येथे ०८ ऑगस्ट रोजी मोटरसायकल जप्त केल्याच्या वादातून व पूर्ववैमनस्यातून इंदरजितसिंह बावरी (वय २५, रा. कौठा) यांचा खंजराने वार करून खून करण्यात आला होता. या प्रकरणात नांदेड ग्रामीण पोलीस ठाण्यात गुन्हा दाखल होताच एलसीबीच्या पथकाने आरोपींचा शोध सुरू केला.
तांत्रिक विश्लेषण आणि गुप्त माहितीच्या आधारे पोलिसांनी १) दिलीप पुंडलिक डाकोरे (वय ३३), २) कृष्णा दिगंबर बारोळे (वय २९), ३) रणजीत उर्फ रंज्या चांदू सूर्यवंशी (वय २३), ४) ज्योती जगदिश बिगानिया (वय ४०) आणि ५) एका विधीसंघर्षग्रस्त बालकासह पाच जणांना ताब्यात घेतले असून पुढील कायदेशीर प्रक्रिया सुरू आहे.
२. इतवारा येथील भंगार वेचणाऱ्याच्या खून प्रकरणात एकास अटक इतवारा हद्दीतील संगम कार बाजार परिसरात ०७ ऑगस्टच्या रात्री भंगार वेचणाऱ्या मयत मंगल शंकर गवळी (रा. लोंढे सांगवी, जि. नांदेड) यांच्या डोक्यात पेव्हर ब्लॉक घालून खून करण्यात आला होता. या प्रकरणी इतवारा पोलीस ठाण्यात गुन्हा नोंदवण्यात आला.
स्थानिक गुन्हे शाखा व इतवारा गुन्हे शोध पथकाने संशयित आरोपी सुजल उर्फ सुजित सुनिल पोटभरे (वय २१, रा. श्रावस्तीनगर, नांदेड) याला ताब्यात घेतले आहे. दारूच्या नशेत भंगार वेचण्याच्या जुन्या वादातून हा खून झाल्याचे प्राथमिक तपासात निष्पन्न झाले आहे.
३. भाग्यनगर हद्दीत कौटुंबिक तणावातून आईचा खून व मुलाची आत्महत्या तरोडा भागातील राहुल कॉलनी येथे ०८ ऑगस्ट रोजी एक हृदयद्रावक घटना घडली. मानसिक तणाव व डिप्रेशनमध्ये असलेल्या प्रतीक बालाजी चौथरे (वय २६) या तरुणाने आपली आई भारती बालाजी चौथरे (वय ५०) यांच्यावर लोखंडी रॉड व चाकूने हल्ला करून त्यांचा खून केला आणि त्यानंतर स्वतः गळफास घेऊन आत्महत्या केली. भाग्यनगर पोलिसांनी या प्रकरणी गुन्हा नोंदवला असून पोलीस निरीक्षक महेश माळी पुढील तपास करत आहेत.
पोलीस पथकाची प्रभावी कामगिरी ही सर्व कारवाई पोलीस अधीक्षक डॉ. नीलाभ रोहन, अपर पोलीस अधीक्षक श्रीमती अर्चना पाटील, उपविभागीय पोलीस अधिकारी रामेश्वर वैजने आणि प्रशांत शिंदे यांच्या मार्गदर्शनाखाली पोनि अतुल भोसले, रामेश्वर खनाळ, संजय शिंदे, सपोनि रवी वाघूळे, विठ्ठल घोगरे, गोविंद खैरे, पोउपनि साईनाथ पुयड, मिलींद सोनकांबळे, प्रविण आगलावे आणि एलसीबी/इतवारा/सायबर सेलच्या अंमलदारांच्या पथकाने यशस्वीरीत्या पार पाडली.
