नांदेड, दि. 30 डिसेंबर (प्रतिनिधी)
नांदेड वाघाळा शहर महानगरपालिकेच्या निवडणूक प्रक्रियेअंतर्गत उमेदवारी अर्ज दाखल करण्याच्या शेवटच्या दिवशी महानगरपालिका कार्यालयात मोठ्या प्रमाणात गर्दी झाली होती. याच पार्श्वभूमीवर वार्ड क्रमांक 6, 7 व 8 झोनमधील घडामोडींचे वार्तांकन करण्यासाठी गेलेले शहरातील पत्रकार माधव विश्वनाथ वाघमारे यांच्याशी कर्तव्यावर असलेल्या पोलीस उपनिरीक्षक बनसोडे (शिवाजीनगर पोलीस स्टेशन) यांनी गैरवर्तन केल्याचा आरोप करण्यात आला आहे.
पत्रकार माधव वाघमारे हे महानगरपालिका कार्यालयात उमेदवारांच्या अर्ज प्रक्रियेबाबत माहिती संकलन व वार्तांकन करत असताना, संबंधित पोलीस अधिकाऱ्यांनी त्यांना धक्काबुक्की करून बाहेर काढले, तसेच गेटच्या बाहेर ढकलून कुलूप लावून निघून गेल्याचा आरोप आहे. या प्रकारामुळे पत्रकारितेच्या कार्यात अडथळा निर्माण झाला असून, लोकशाहीच्या चौथ्या स्तंभाचा अपमान झाल्याची भावना पत्रकार बांधवांकडून व्यक्त केली जात आहे.
महानगरपालिका निवडणूक ही लोकशाही प्रक्रियेतील महत्त्वाची बाब असून, त्याचे निष्पक्ष व पारदर्शक वार्तांकन होणे आवश्यक असते. अशा वेळी पत्रकारांना आवश्यक सहकार्य मिळणे अपेक्षित असताना, घडलेला प्रकार चिंताजनक असल्याचे मत व्यक्त होत आहे. पत्रकार समाज व प्रशासन यांच्यातील दुवा म्हणून कार्य करतात आणि जनतेपर्यंत अचूक माहिती पोहोचवण्याची जबाबदारी पार पाडतात.
लोकशाही शासन व्यवस्थेमध्ये पत्रकार आणि प्रशासन यांची भूमिका परस्परपूरक आहे. पोलीस प्रशासन हे कार्यपालिका म्हणून जनतेच्या सुरक्षेसाठी कार्यरत असते, तर पत्रकार समाजहितासाठी सतत कार्य करत असतात. त्यामुळे दोन्ही घटकांमध्ये समन्वय व परस्पर सन्मान आवश्यक आहे. मात्र, या घटनेमुळे पोलीस प्रशासनाकडून पत्रकारांना डावलले जात असल्याची भावना पुन्हा एकदा पुढे आली आहे.
या संपूर्ण प्रकरणाची जिल्ह्याचे पोलीस अधीक्षक अबिनाश कुमार यांनी गांभीर्याने दखल घ्यावी, संबंधित घटनेची चौकशी करून आवश्यक ती समज व मार्गदर्शन आपल्या अधिनस्त कर्मचाऱ्यांना द्यावे, तसेच भविष्यात अशा घटना घडू नयेत यासाठी योग्य सूचना द्याव्यात, अशी मागणी पत्रकार संघटना व पत्रकार बांधवांकडून करण्यात येत आहे. पोलीस प्रशासन व पत्रकार यांनी परस्पर समन्वयाने, लोकशाही मूल्यांचे जतन करत जनहितासाठी एकत्रितपणे कार्य करावे, अशी अपेक्षा यावेळी व्यक्त करण्यात आली आहे.
