नांदेड ३१ डिसेंबर (प्रतिनिधी) माधव वाघमारे
जिल्ह्यात अमली पदार्थांच्या तस्करीविरोधात पोलिसांनी ठोस कारवाई करत ४४ हजार रुपये किमतीचा गांजा जप्त केला असून तिघा आरोपींविरोधात एनडीपीएस कायद्यानुसार गुन्हा दाखल करण्यात आला आहे. ही कारवाई स्थानिक गुन्हे शाखेच्या पथकाने शिवाजीनगर पोलीस ठाण्याच्या हद्दीत केली.
पोलीस अधीक्षक मा. अबिनाश कुमार (नांदेड) यांच्या मार्गदर्शनाखाली अवैध धंद्यांविरोधात माहिती संकलन व कारवाईचे आदेश देण्यात आले होते. त्यानुसार स्थानिक गुन्हे शाखेचे पोलीस निरीक्षक उदय खंडेराय व सहाय्यक पोलीस निरीक्षक वसंत आरसेवार यांना गुप्त माहिती मिळाली की शिवाजीनगर परिसरात गांजाची विक्री होणार आहे.
मिळालेल्या खात्रीशीर माहितीनुसार पोलिसांनी पंच व संबंधित अधिकाऱ्यांसह सापळा रचत छापा टाकला. या कारवाईत आरोपी मोहम्मद इसाक मोहम्मद युसुफ (वय ५०, व्यवसाय मजुरी, रा. नवी आबादी, शिवाजीनगर, नांदेड) याच्या ताब्यातून सुमारे २ किलो २०० ग्रॅम वजनाचा गांजा जप्त करण्यात आला. जप्त केलेल्या गांजाची अंदाजे किंमत ४४,००० रुपये आहे.
तपासादरम्यान गांजाची विक्री करण्यासाठी मदत करणारे इतर दोन आरोपी
१) रोशन अनिस, रा. नवी आबादी, शिवाजीनगर, नांदेड
२) शंकर उर्फ भोला पि. अशोक वगरे, रा. जयभीमनगर, नांदेड, ता. जि. नांदेड
यांची नावे उघड झाली असून त्यांचाही गुन्ह्यात समावेश करण्यात आला आहे.
या प्रकरणी शिवाजीनगर पोलीस ठाण्यात एनडीपीएस ॲक्टच्या कलमांखाली गुन्हा दाखल करण्यात आला असून पुढील तपास सहाय्यक पोलीस निरीक्षक वसंत आरसेवार करत आहेत. सदर कारवाईमुळे नांदेड जिल्ह्यात अमली पदार्थविरोधी मोहिमेला मोठे यश मिळाले असून अशा अवैध धंद्यांवर कठोर कारवाई सुरूच राहणार असल्याचा इशारा पोलिसांनी दिला आहे.
