नांदेड ११ ऑगस्ट प्रतिनिधी
केक खरेदी करण्याच्या बहाण्याने दुकानात शिरून दुकानदाराला शिवीगाळ व धाक दाखवून ४,५०० रुपयांची रोकड जबरदस्तीने लुटणाऱ्या दोन आरोपींना वजिराबाद पोलिसांच्या गुन्हे शोध पथकाने अवघ्या काही तासांत जेरबंद केले आहे. ही घटना ९ ऑगस्ट २०२६ रोजी रात्रीच्या सुमारास घडली असून याप्रकरणी वजिराबाद पोलीस ठाण्यात गुन्हा दाखल करण्यात आला आहे.
नेमकी घटना काय? मिळालेल्या माहितीनुसार, ९ ऑगस्ट रोजी तक्रारदार हे आपल्या नेहमीप्रमाणे ‘केक हब’ दुकानात काम करत होते. रात्रीच्या सुमारास अंदाजे २० ते २५ वर्षे वयोगटातील तीन अनोळखी इसम स्प्लेंडर मोटारसायकलवरून दुकानात आले. त्यांनी केकाची मागणी करत फिर्यादीकडे पैशांची मागणी केली. फिर्यादीने पैसे देण्यास नकार दिला असता, आरोपींनी शिवीगाळ करत व धाक दाखवून फिर्यादीच्या खिशातील ४,५०० रुपये रोख रक्कम जबरदस्तीने काढून घेतली आणि पोबारा केला. याप्रकरणी वजिराबाद पोलीस ठाण्यात गु.र.नं. ३९७/२०२६, कलम ३०९(४), ३५१(२), ३(५) भारतीय न्याय संहिता अन्वये गुन्हा दाखल करण्यात आला.
सीसीटीव्ही फुटेज आणि तांत्रिक तपासावरून आरोपी निष्पन्न घटनेचे गांभीर्य लक्षात घेऊन नांदेडचे पोलीस अधीक्षक मा. डॉ. निलाभ रोहन यांच्या आदेशाने वजिराबादचे प्रभारी अधिकारी पोनि. अजित कुंभार यांच्या नेतृत्वात पोउपनि. सुनील बुलंगे व गुन्हे शोध पथकाने तातडीने तपास सुरू केला. घटनास्थळावरील सीसीटीव्ही कॅमेऱ्यांचे फुटेज तपासले असता, आरोपी MH-26 CT-2947 या मोटारसायकलचा वापर करून आल्याचे निष्पन्न झाले.
तांत्रिक माहिती, गुप्त बातमीदार आणि स्थानिक माहितीच्या आधारे पोलिसांनी शोध घेऊन खालील दोन आरोपींना ताब्यात घेतले: १) तारू शेषेराव खिल्लारे (वय २६, रा. गोवर्धनघात टेकडी, नांदेड) २) अनिकेेत कालिदास खिल्लारे (वय २०, रा. बौद्ध विहार जवळ, गोवर्धनघात टेकडी, नांदेड)
या गुन्ह्यातील तिसरा आरोपी योगेश पि. ज्ञानेश्वर वाघमारे हा सध्या फरार असून पोलीस त्याचा शोध घेत आहेत. पोलिसांनी आरोपींकडून जबरदस्तीने घेतलेली रोख रक्कम व गुन्ह्यात वापरलेली मोटारसायकल जप्त केली आहे.
कामाची कामगिरी सदर यशस्वी कारवाई पोलीस अधीक्षक डॉ. निलाभ रोहन, पोलीस उपअधीक्षक रामेश्वर वैजने यांच्या मार्गदर्शनाखाली पोनि. अजित कुंभार, सपोनि. प्रशांत लोढे, पोउपनि. सुनील बुलंगे तसेच अंमलदार शिवशांब मठपती, विलास कदम, ज्वालासिंग बावरी, संतोष पोकळे, संतोष पावडे, भाऊसाहेब राठोड आणि इम्रान पठाण यांच्या पथकाने केली.
नागरिकांना पोलिसांचे आवाहन नागरिकांनी कोणत्याही प्रकारच्या धमकी, जबरदस्ती किंवा लुटीच्या घटनेला न घाबरता तात्काळ जवळच्या पोलीस ठाण्याशी संपर्क साधावा. तसेच व्यावसायिकांनी दुकानांमध्ये सीसीटीव्ही कॅमेरे कार्यरत ठेवावेत, जेणेकरून गुन्हेगारांचा शोध घेणे सोपे होईल, असे आवाहन पोलिसांनी केले आहे.
विशेष बातमी प्रतिनिधी: माधव वाघमारे
