प्रतिनिधी: माधव वाघमारे २० ऑक्टोंबर
नांदेड जिल्ह्यात अवैध गोवंश वाहतूक रोखण्यासाठी पोलीस अधीक्षक मा. डॉ. निलाभ रोहन यांच्या आदेशानुसार विशेष मोहीम राबवली जात आहे. या मोहिमेअंतर्गत नांदेड ग्रामीण पोलीस ठाण्याच्या पथकाने धनेगाव रोडवर सापळा रचून कारवाई करत अवैध व क्रूरपणे गोवंशाची वाहतूक करणारे अशोक लेलँड वाहन जप्त केले आहे. या कारवाईत २ गोवंश जनावरांची सुटका करण्यात आली असून वाहनासह सुमारे ६ लाख ४० हजार रुपयांचा मुद्देमाल जप्त करण्यात आला आहे.
गोपनीय माहितीच्या आधारे रचला सापळा
दिनांक १९ ऑक्टोबर २०२६ रोजी पोलीस ठाणे नांदेड ग्रामीणचे प्रभारी अधिकारी अशोक जाधव यांच्या आदेशाने पोलीस पथक हद्दीत गस्त घालत असताना दुधडेअरी ते धनेगाव जाणार्‍या रोडवर एका अशोक लेलँड वाहनातून कत्तलीसाठी गोवंश जनावरांची बेकायदेशीर वाहतूक केली जात असल्याची गुप्त बातमी मिळाली. या माहितीवरून पोलिसांनी धनेगाव रोडवर तात्काळ सापळा रचला.
वाहनाची तपासणी आणि जप्ती
संशयित अशोक लेलँड वाहन (क्रमांक MH-14 GU-1343) थांबवून पंचांसमक्ष तपासणी केली असता, वाहनामध्ये २ गोवंश बैल जनावरे दोरीने निर्दयतेने बांधून वाहतूक करत असल्याचे आढळून आले.
पोलिसांनी पंचांसमक्ष कारवाई करत:
- अशोक लेलँड वाहन (MH-14 GU-1343): किंमत सुमारे ₹५,५०,०००/-
- गोवंश जनावरे (०२ बैल): किंमत सुमारे ₹९०,०००/-
- एकूण मुद्देमाल: ₹६,४०,०००/- जप्त केला आहे.
पाच जणांवर गुन्हा दाखल
या प्रकरणी खालील आरोपींविरुद्ध नांदेड ग्रामीण पोलीस ठाण्यात गु.र.नं. १३५९/२०२६, कलम ५, ५(अ) महाराष्ट्र प्राणि संरक्षण अधिनियम सह कलम ९ प्राण्यांना क्रूरतेने वागवणूक प्रतिबंधक कायद्यान्वये गुन्हा दाखल करण्यात आला आहे:
- गंगाधर धोंडीबा इबितदार (वय ४५ वर्षे, रा. पालम)
- अदनान कुरेशी (वय २५ वर्षे)
- तनवीर कुरेशी
- दत्ता विठ्ठलराव पौळ (वय ३२ वर्षे, रा. जवळा, ता. पालम)
- पांडुरंग दत्ताराव कराळे (वय ४० वर्षे, रा. पारवा, ता. पालम)
पोलीस पथकाची कामगिरी
ही यशस्वी कारवाई नांदेड जिल्ह्याचे पोलीस अधीक्षक मा. डॉ. निलाभ रोहन यांच्या आदेशाने आणि अपर पोलीस अधीक्षक मा. सूरज गुरव यांच्या मार्गदर्शनाखाली पोलीस निरीक्षक अशोक जाधव, पोउपनि अनंत चव्हाण, तसेच पोलीस अंमलदार भिसे, कल्याणकर, आणि टिपरसे यांनी केली आहे.
पोलीस प्रशासनाचे आवाहन: नागरिकांना गोवंशाची अवैध वाहतूक, प्राण्यांवर क्रूरता किंवा कत्तलीसाठी संशयास्पद वाहतूक होत असल्याचे आढळल्यास तात्काळ जवळच्या पोलीस ठाण्याशी किंवा डायल ११२ वर संपर्क साधून माहिती द्यावी, असे आवाहन पोलीस प्रशासनाकडून करण्यात आले आहे.
