नांदेड २२ ऑगस्ट (विशेष प्रतिनिधी)
नांदेड शहरात अवैध अग्निशस्त्रांविरोधात पोलिसांनी कडक पावले उचलली असून स्थानिक गुन्हे शाखेच्या पथकाने नवाघाट परिसरामध्ये कारवाई करत दोन जणांना ताब्यात घेतले आहे. त्यांच्याकडून ३२ हजार रुपये किमतीचे एक गावठी बनावटीचे लोखंडी पिस्तुल आणि जिवंत काडतूस जप्त करण्यात आले आहे. याप्रकरणी तीन जणांविरुद्ध गुन्हा दाखल करण्यात आला असून मुख्य पुरवठादार फरार आहे.
पोलीस अधीक्षक मा. डॉ. निलाभ रोहन यांच्या आदेशानुसार जिल्ह्यात अवैध अग्निशस्त्रे बाळगणाऱ्यांविरुद्ध विशेष मोहीम राबवली जात आहे. दिनांक २१ ऑगस्ट २०२६ रोजी स्थानिक गुन्हे शाखेचे पोउनि महेश कोरे व त्यांचे पथक नांदेड शहरात गस्त घालत असताना, नवाघाट परिसरातील व्यायाम शाळेंजवळील रोडवर दोन इसम संशयास्पद रित्या फिरत असल्याची बातमी गुप्त बातमीदाराकडून मिळाली.
पोलिसांनी तात्काळ घटनास्थळी धाव घेऊन मोहम्मद फयाज अब्दुल रौफ (वय २९ वर्षे, रा. अहमदनगर गोल्डन बेकरी, देगलूर नाका, नांदेड) आणि मोहम्मद समीर मोहम्मद ताहेर अंसारी (वय २६ वर्षे, रा. जी.एम. कॉलनी, दुल्हेशहा रहमान नगर, नांदेड) या दोघांना ताब्यात घेतले.
झाडाझडती दरम्यान मोहम्मद फयाज याच्या पॅन्टच्या खिशात लपवून ठेवलेले अंदाजे ३० हजार रुपये किमतीचे गावठी बनावटीचे लोखंडी पिस्तुल आणि २ हजार रुपये किमतीचे मॅगझीनमधील जिवंत काडतूस जप्त करण्यात आले. हे शस्त्र परवेज बेग हाजी बेग (रा. देगलूर नाका, नांदेड) याच्याकडून विकत घेतल्याचे प्राथमिक चौकशीत निष्पन्न झाले आहे.
या प्रकरणी पोलीस स्टेशन इतवारा येथे भारतीय शस्त्र अधिनियम कलम ३/२५ अन्वये गुन्हा नोंदवण्यात आला असून फरार आरोपी परवेज बेगचा शोध सुरू आहे.
सदरची धडक कारवाई पोलीस अधीक्षक मा. डॉ. निलाभ रोहन, अपर पोलीस अधीक्षक मा. सूरज गुरव यांच्या मार्गदर्शनाखाली पोलीस निरीक्षक अतुल भोसले, पोउनि महेश कोरे तसेच पोलीस अंमलदार श्रीराम दासरे, संघरत्न गायकवाड, माधव माने, मनोज राठोड, सुधाकर देवकते व महेश बडगु यांच्या पथकाने पार पाडली.
– बातमी प्रतिनिधी: माधव वाघमारे
