प्रतिनिधी २३ ऑगस्ट (माधव वाघमारे) मराठा आरक्षणाच्या तीव्र मागणीसाठी मनोज जरांगे पाटील यांनी येत्या २९ ऑगस्ट रोजी आंदोलनाची हाक दिली आहे. या आंदोलनाच्या पार्श्वभूमीवर लोहा तालुक्यातील किवळा, वडगाव, ढाकणी आणि परिसरातील विविध गावांमध्ये धडक ‘गावभेट दौरा’ आयोजित करण्यात आला होता. या दौऱ्यादरम्यान गरजवंत मराठा समाजबांधवांशी थेट संवाद साधून आगामी आंदोलनाबाबत जागृती करण्यात आली.
यावेळी उपस्थितांना संबोधित करताना मराठा क्रांती मोर्चाच्या राज्य समन्वयक सुचिता जोगदंड वडजे यांनी मराठा समाजाला एकजूट दाखवण्याचे आवाहन केले. त्या म्हणाल्या, “मनोज जरांगे पाटील यांनी पुकारलेल्या आंदोलनाला गरजवंत मराठ्यांनी लाखोंच्या संख्येने उपस्थित राहून पूर्ण पाठिंबा दिला पाहिजे. जरांगे पाटील यांचे मनोबल वाढविण्यासोबतच, गरजवंत मराठा समाज आजही आपल्या रास्त मागण्यांवर ठाम आहे, हा स्पष्ट संदेश सरकारला देण्यासाठी अंतरवाली सराटी येथे सर्वांची उपस्थिती अत्यंत आवश्यक आहे.”
घोषणाबाजीने परिसर दणाणला गावभेटीदरम्यान गावागावांतील महिला, तरुण आणि नागरिकांनी उत्स्फूर्त प्रतिसाद दिला. ठिकठिकाणी “मनोज दादा, तुम आगे बढ़ो, हम तुम्हारे साथ हैं” अशा जोरदार घोषणा देण्यात आल्या, ज्यामुळे संपूर्ण परिसर दणाणून गेला होता.
प्रमुख कार्यकर्त्यांची उपस्थिती आगामी आंदोलनाच्या तयारीसाठी आणि मराठा समाजाची वज्रमूठ अधिक घट्ट करण्यासाठी हा गावभेट दौरा अत्यंत यशस्वी ठरल्याचे आयोजकांनी सांगितले. या दौऱ्यात सुमित्राताई वडकर, अर्चनाताई होगे, सुनीताताई बोंगाणे, सुनीताताई कल्याणकर, रत्नमालाताई जाधव, गीतांजलीताई पवार यांच्यासह मराठा सेवक बालाजी नावंदे, सतीश नरवाडे आणि स्थानिक नागरिक व युवक मोठ्या संख्येने सहभागी झाले होते.
