नांदेड १८ ऑक्टोंबर( प्रतिनिधी – माधव वाघमारे
नांदेड शहरामध्ये बेकायदेशीररित्या अंमली पदार्थांची विक्री करणाऱ्या दोन आरोपींना स्थानिक गुन्हे शाखेच्या पथकाने रंगेहात पकडले आहे. त्यांच्याकडून तब्बल ६२ ग्रॅम वजनाचा ‘ब्राऊन शुगर’ (चिटा) हा अंमली पदार्थ आणि ३ लाख १० हजार रुपये किमतीचा मुद्देमाल जप्त करण्यात आला आहे.
नेमकी घटना काय?
नांदेड जिल्ह्यात अंमली पदार्थांविरोधात पोलीस अधीक्षक मा. डॉ. नीलाभ रोहन यांच्या आदेशावरून विशेष मोहीम राबवली जात आहे. या मोहिमेअंतर्गत दि. १८ ऑक्टोबर २०२६ रोजी स्थानिक गुन्हे शाखेचे सपोनि/रवि वाहुळे यांना गुप्त बातमीदाराकडून गोपनीय माहिती मिळाली. भाग्यनगर पोलीस ठाण्याच्या हद्दीतील श्रीनगर, विवेकनगर भागातील आशिश किराणा दुकानाजवळ सिमेंट रोडवर दोन इसम स्वतःच्या फायद्यासाठी बेकायदेशीररित्या ब्राऊन शुगर विक्रीच्या उद्देशाने थांबले आहेत.
कारवाई आणि मुद्देमाल जप्ती
माहिती मिळताच पोलीस अधीक्षक मा. डॉ. नीलाभ रोहन यांच्या परवानगीने, स्थानिक गुन्हे शाखेचे पोलीस निरीक्षक अतुल भोसले यांच्या नेतृत्वात धाड टाकण्याचे नियोजन करण्यात आले. शासकीय पंच, वैधमापन शास्त्र विभागाचे राजपत्रित अधिकारी आणि फॉरेन्सिक टीमसह दुपारी आशिश किराणा दुकानाजवळ छापा टाकण्यात आला.
त्यावेळी संशयितरीत्या आढळलेल्या दोन इसमांना ताब्यात घेण्यात आले. त्यांची नावे:
- गुरबिरसिंग हरपालसिंग संधु (वय ५० वर्षे, रा. तरण तारण, राज्य पंजाब, ह.मु. श्रीनगर, नांदेड)
- जनार्दन गोविंदराव सोनटक्के (वय ३० वर्षे, रा. ब्राह्मणवाडा, ता. जि. नांदेड)
राजपत्रित अधिकारी व पंचांसमक्ष घेतलेल्या अंगझडतीत आरोपींच्या पॅन्टच्या खिशातून ६२.०० ग्रॅम वजनाचा ‘ब्राऊन शुगर’ (अंदाजे किंमत ₹३,१०,०००/-) हस्तगत करण्यात आला. फॉरेन्सिक सायन्सच्या सहाय्यक रासायनिक विश्लेषकांनी सदर पदार्थ ‘ब्राऊन शुगर’ असल्याचे निश्चित केले.
पंजाब कनेक्शन समोर!
आरोपींकडे कसून चौकशी केली असता, हा अंमली पदार्थ त्यांनी निक्का व बंटी (दोघे रा. पंजाब) यांच्याकडून विकत आणल्याचे सांगितले. याप्रकरणी सपोनि/रवि वाहुळे यांच्या फिर्यादीवरून पोलीस ठाणे भाग्यनगर येथे गुरनं. ६०४/२०२६, कलम ८(क), २१(ब), २९ एन.डी.पी.एस. कायद्यान्वये गुन्हा दाखल करण्याची प्रक्रिया सुरू आहे.
पोलीस पथक
सदरची कामगिरी पोलीस अधीक्षक मा. डॉ. नीलाभ रोहन यांच्या आदेशाने, पोलीस निरीक्षक अतुल भोसले यांच्या मार्गदर्शनाखाली सपोनि/रवि वाहुळे, पोउपनि/बळीराम दासरे, पोलीस अंमलदार दारासिंग राठोड, गुंडेराव करले, रितेश कुलथे, दिलीपकुमार चंचलवार, उमर शेख, सुनिल गडलेवार, मोतीराम पवार, सिद्धार्थ सोनसळे, नरेन्द्र राठोड, तसेच वैधमापन शास्त्र विभागाचे निरीक्षक ब्रह्मानंद सावते व फॉरेन्सिक टीमचे राजेश पांचाळ, वेदांत नगनुरवार यांनी पार पाडली.
