प्रतिनिधी: माधव वाघमारे
नांदेड, दि. २ ऑक्टोंबर केंद्र सरकारचे सहसचिव पी. नरहरी यांनी नांदेड जिल्ह्यातील येरगी येथे भेट देऊन ग्रामसभा आणि ‘रिफॉर्म उत्सवात’ उत्स्फूर्त सहभाग घेतला. यावेळी त्यांनी ग्रामस्थांशीथेट संवाद साधत शाश्वत ग्रामविकासाच्या दिशेने सुरू असलेल्या प्रयत्नांचे भरभरून कौतुक केले. विशेषतः येरगी येथील ‘बालिका पंचायत’ उपक्रमाची त्यांनी विशेष दखल घेत हा प्रयोग देशभरासाठी अनुकरणीय असल्याचे नमूद केले.
प्रमुख मुद्दे व कार्यक्रमाची वैशिष्ट्ये:
- बालिका पंचायतचे कौतुक: ग्रामीण भागातील बालिकांमध्ये नेतृत्वगुण विकसित करणे आणि त्यांना निर्णयप्रक्रियेत सामावून घेणे या उपक्रमामुळे शक्य होत असल्याचे श्री. नरहरी यांनी सांगितले.
- महिलांचा सक्रिय सहभाग: ग्रामसभेत महिलांची उपस्थिती लक्षणीय होती. महिलांनी विकासात्मक विषयांवर आपली मते व सूचना मांडत स्थानिक प्रशासनात आपला सहभाग अधोरेखित केला.
- विकासकामांचे भूमिपूजन व वृक्षारोपण: कार्यक्रमादरम्यान श्री. नरहरी यांच्या हस्ते वृक्षारोपण करण्यात आले तसेच ‘जलतारा’ कामांचे भूमिपूजन करून जलसंधारणाला गती देण्यात आली.
- योजनांचा आढावा: रिफॉर्म उत्सवाच्या माध्यमातून शासनाच्या लोककल्याणकारी योजनांच्या अंमलबजावणीची पाहणी करण्यात आली. तसेच प्रत्यक्ष लाभार्थ्यांशी संवाद साधत त्यांच्या जीवनात झालेल्या बदलांची माहिती घेण्यात आली.
- प्रशासनिक उपस्थिती: या महत्त्वपूर्ण ग्रामसभेस जिल्हाधिकारी राहुल कर्डिले, मुख्य कार्यकारी अधिकारी महेश पाटील, अतिरिक्त मुख्य कार्यकारी अधिकारी परीक्षित यादव, उपमुख्य कार्यकारी अधिकारी दत्तात्रय गिरी यांच्यासह जिल्हा व गाव पातळीवरील अधिकारी आणि ग्रामस्थ मोठ्या संख्येने उपस्थित होते.
शासनाच्या योजनांची प्रभावी अंमलबजावणी आणि ग्रामस्थांचा सक्रिय सहभाग यामुळे येरगी येथील ग्रामसभा आणि रिफॉर्म उत्सव ग्रामीण विकासाचे एक नवे प्रेरणास्थान ठरला आहे.
