नांदेड १२ ऑगस्ट (विशेष प्रतिनिधी)
धनेगाव येथील पेट्रोल पंपावर जुन्या वादातून खंजीराने वार करून करण्यात आलेल्या बहुचर्चित हत्या प्रकरणातील आणखी एका फरार आरोपीला जेरबंद करण्यात स्थानिक गुन्हे शाखेच्या पथकाला यश आले आहे. अजय उर्फ अज्जू महेंद्र बिगानिया (वय ३२, रा. वाल्मिकी नगर, देगलूर नाका, नांदेड) असे अटक करण्यात आलेल्या आरोपीचे नाव आहे.
नेमकी घटना काय? ८ ऑगस्ट रोजी फिर्यादी व मयत इंद्रजितसिंग पिता बलजितसिंग बावरी (वय २५, रा. संत गाडगेबाबा सोसायटी, जुना कौठा) हे धनेगाव येथील धनेगावकर पेट्रोल पंपावर मोटरसायकलमध्ये पेट्रोल भरण्यासाठी गेले होते. त्यावेळी नितीन बिगानिया, दिलीप डाकोरे, किन्ना परदेशी व त्यांच्या इतर साथीदारांनी पूर्ववैमनस्यातून कट रचून त्यांच्यावर हल्ला चढवला. या हल्ल्यात खंजीराने गंभीर वार करून इंद्रजितसिंग यांची हत्या करण्यात आली. याप्रकरणी नांदेड ग्रामीण पोलीस ठाण्यात गुन्हा रजि. नं. ९५१/२०२६ अन्वये भारतीय न्याय संहिता व भारतीय हत्यार कायद्याच्या विविध कलमांनुसार गुन्हा दाखल करण्यात आला होता.
गोवर्धन घाट परिसरातून आरोपीला ठोकल्या बेड्या पोलीस अधीक्षक मा. डॉ. नीलाभ रोहन यांच्या आदेशानुसार गंभीर गुन्ह्यांतील फरार आरोपींचा शोध घेण्यासाठी स्थानिक गुन्हे शाखेचे विशेष अभियान सुरू आहे. ११ ऑगस्ट रोजी गुन्हे शाखेचे पोउपनि पयूड व त्यांचे पथक वजीराबाद पोलीस ठाण्याच्या हद्दीत गस्त घालत असताना, सदर गुन्ह्यातील आरोपी अजय उर्फ अज्जू हा गोवर्धन घाट परिसरात लपून बसल्याची गुप्त माहिती मिळाली. पथकाने तत्काळ सापळा रचून संशयितरित्या वावरणाऱ्या आरोपीला ताब्यात घेतले. चौकशीदरम्यान त्याने धनेगाव पेट्रोल पंपावरील हत्येच्या गुन्ह्याची कबुली दिली असून त्यास पुढील कारवाईसाठी नांदेड ग्रामीण पोलिसांच्या स्वाधीन करण्यात आले आहे.
आत्तापर्यंत ६ आरोपी पोलिसांच्या जाळ्यात या गुन्ह्यात स्थानिक गुन्हे शाखेने यापूर्वीच ५ आरोपींना ताब्यात घेतले असून, अजय उर्फ अज्जूच्या अटकेनंतर या प्रकरणातील एकूण आरोपींची संख्या ६ झाली आहे. सर्व आरोपींची गुन्ह्यातील भूमिका, हल्ल्याचे नियोजन व वापरलेली शस्त्रे याबाबत पोलीस गांभीर्याने तपास करत आहेत.
कामगिरी करणारे पथक ही यशस्वी कारवाई पोलीस अधीक्षक मा. डॉ. नीलाभ रोहन यांच्या मार्गदर्शनाखाली पोनि अतुल भोसले, पोउपनि साईनाथ पयूड, तसेच पोलीस अंमलदार संदीप घोगरे, बालाजी कदम, इम्रान शेख, संतोष बेल्लुरोड, प्रमोद जोंधळे, रवी हराळे आणि अमोल घेवारे (सर्व स्थानिक गुन्हे शाखा, नांदेड) यांच्या पथकाने पार पाडली.
– प्रतिनिधी माधव वाघमारे
