कंधार ८ ऑगस्ट (विशेष प्रतिनिधी)
नांदेड जिल्ह्यात अवैध गौण खनिज उत्खनन व वाहतुकीस आळा घालण्यासाठी पोलीस अधीक्षक मा. डॉ. नीलाभ रोहन यांच्या संकल्पनेतून विशेष मोहीम राबवली जात आहे. या मोहिमेअंतर्गत कंधार पोलिसांनी धडक कारवाई करत अवैध रेतीची वाहतूक करणारा हायवा आणि रेती असा एकूण ४,२५,००० रुपयांचा मुद्देमाल जप्त केला आहे.
मिळालेल्या माहितीनुसार, ७ ऑगस्ट २०२६ रोजी कंधार पोलीस ठाण्याचे पथक परिसरात गस्त घालत असताना गोपनीय बातमीदाराकडून माहिती मिळाली की, चिंचोली बायपास रोडवरील हनुमान मंदिर परिसरातून टाटा कंपनीचा पिवळ्या रंगाचा हायवा (क्र. MH-26 BE-9198) बेकायदेशीरपणे रेतीची वाहतूक करत आहे. माहितीची खातरजमा करून पोलिसांनी तत्काळ घटनास्थळी धाव घेत वाहनाला अडवले.
वाहनाची तपासणी केली असता त्यात ५ ब्रास रेती आढळून आली. चालकाकडे रेती वाहतुकीचा परवाना किंवा आवश्यक कागदपत्रे नसल्याचे स्पष्ट झाल्याने शासनाची रॉयल्टी चुकवून ही वाहतूक केली जात असल्याचे निष्पन्न झाले. पोलिसांनी ४,००,००० रुपये किमतीचा टाटा हायवा आणि २५,००० रुपये किमतीची ५ ब्रास रेती असा एकूण ४,२५,००० रुपयांचा मुद्देमाल जप्त केला.
याप्रकरणी हायवा चालक भुजंग केशव शिंदे (वय २४ वर्षे, रा. रोहिपिंपळगाव, ता. मुदखेड, जि. नांदेड) याच्याविरुद्ध कंधार पोलीस ठाण्यात गुन्हा क्रमांक ३०३/२०२६, कलम ३०३(२) भारतीय न्याय संहिता (BNS), २०२३ अन्वये गुन्हा नोंदवण्यात आला आहे.
ही यशस्वी कारवाई पोलीस अधीक्षक मा. डॉ. नीलाभ रोहन यांच्या आदेशाने, उपविभागीय पोलीस अधिकारी (कंधार उपविभाग) सुशील जुमडे यांच्या मार्गदर्शनाखाली कंधार पोलीस ठाण्याचे पोलीस निरीक्षक अरविंद घोडके, पोलीस अंमलदार गणपती केंद्र, डिकळे व शंकर कामवाड यांनी केली.
अवैध गौण खनिज उत्खनन व वाहतूक करणाऱ्यांवर यापुढेही अशीच कठोर कारवाई सुरू राहील, असा इशारा पोलीस प्रशासनाने दिला आहे.
प्रतिनिधी, माधव वाघमारे
