नांदेड १५ ऑगस्ट (प्रतिनिधी माधव वाघमारे) जिल्ह्यात अवैध शस्त्र बाळगणाऱ्यांविरुद्ध धडक कारवाई करण्याचे निर्देश पोलीस अधीक्षक मा. डॉ. निलाभ रोहन यांनी दिले होते. या आदेशानुसार स्थानिक गुन्हे शाखेच्या पथकाने हिंगोली गेट फाटक ग्राउंड परिसरात सापळा रचून कारवाई करत अवैध खंबीर साठा आणि मोटारसायकलसह ८९,६०० रुपयांचा मुद्देमाल जप्त केला आहे.

गुप्त माहितीच्या आधारे थरारक कारवाई

दिनांक १४ ऑगस्ट २०२६ रोजी स्थानिक गुन्हे शाखेचे पोलीस उपनिरीक्षक नागनाथ तुकडे व त्यांच्या पथकास गुप्त बातमीदाराकडून माहिती मिळाली की, हिंगोली गेट फाटक ग्राउंड येथे दोन इसम मोटारसायकलवर संशयास्पदरीत्या थांबले असून त्यांच्याकडे खंजीर आहेत. मिळालेल्या माहितीची शहानिशा करून पोलिसांनी पंचांसमक्ष तात्काळ घटनास्थळी धाव घेत दोघांना ताब्यात घेतले.

आरोपींची नावे व झडती

पोलीस तपासात ताब्यात घेतलेल्या दोघांनी आपली नावे खालीलप्रमाणे सांगितली: १. आकाश शंकर पालिमकर (वय २४ वर्षे, व्यवसाय: मजुरी, रा. दीपकनगर, तरोडा बु., नांदेड) २. रोहित आनंदा सावते (वय २३ वर्षे, व्यवसाय: ऑटोचालक, रा. येळेगाव, ता. अर्धापूर, ह.मु. पीडब्ल्यूडी कॉलनीजवळ, आनंदनगर चौक, नांदेड)

या दोघांची पंचांसमक्ष अंगझडती घेतली असता त्यांच्या कमरेला ०२ खंजीर आढळून आले. सदर खंजीर त्यांनी गुरुद्वारा जवळील एका दुकानातून खरेदी केल्याचे पोलिसांना सांगितले.

विक्रेत्याच्या दुकानावर छापा

आरोपींनी दिलेल्या माहितीनुसार स्थानिक गुन्हे शाखेच्या पथकाने गुरुद्वारा गेट नं. ०१, वजिराबाद येथील दुकानाची पाहणी केली. दुकानदार गुरुमतीसिंग खेमसिंग बुंगई (वय ५८ वर्षे, रा. गुरुद्वारा गेट नं. ०१, वजिराबाद, नांदेड) याच्या दुकानाची झडती घेतली असता विक्रीच्या उद्देशाने ठेवलेले आणखी ०७ खंजीर हस्तगत करण्यात आले.

या संपूर्ण कारवाईत पोलिसांनी एकूण ०९ खंजीर आणि गुन्ह्यात वापरलेली एक मोटारसायकल असा एकूण ८९,६०० रुपये किमतीचा मुद्देमाल जप्त केला आहे.

वजिराबाद पोलीस ठाण्यात गुन्हा दाखल

तिन्ही आरोपी आणि जप्त मुद्देमाल पुढील कायदेशीर कारवाईसाठी वजिराबाद पोलीस ठाण्याच्या ताब्यात देण्यात आला आहे. या प्रकरणी पोलीस स्टेशन वजिराबाद येथे गु.र.नं. ४०६/२०२६, कलम ४/२५ भारतीय शस्त्र अधिनियम (Arms Act) अन्वये गुन्हा दाखल करण्यात आला असून पुढील तपास सुरू आहे.

कारवाई करणारे पथक

सदर यशस्वी कारवाई पोलीस अधीक्षक मा. डॉ. निलाभ रोहन यांच्या आदेशाने, स्थानिक गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली पोउपनि/नागनाथ तुकडे, पोलीस अमलबदार मोहन हाके, मिलिंद नरबाग, ब्रह्मानंद लामतुरे, आबाराव पिंगलवाड आणि लहु चाटे asi दारा राठोड यांनी पार पाडली.

पोलीस प्रशासनाचे आवाहन: नांदेड जिल्ह्यात अवैध शस्त्र बाळगणे, वाळू उत्खनन/वाहतूक, अवैध दारू, जुगार, गुटखा, अमली पदार्थांची विक्री व साठवणूक करणाऱ्यांवर कठोर कारवाई सुरूच राहील. नागरिकांच्या परिसरात असा कोणताही बेकायदेशीर व्यवसाय सुरू असल्यास त्याची माहिती तात्काळ नांदेड पोलिसांना द्यावी, असे आवाहन पोलीस प्रशासनाकडून करण्यात आले आहे.