ग्रीन गोवा-क्लीन गोवा’ अभियानाचा शुभारंभ ९० दिवसांत लावली जाणार १० लाख झाडे

प्रतिनिधी, राहुल सरपाते
पणजी, ५ जून २०२६:
गोव्यातील हिरवाईचा विस्तार करण्यासाठी आणि ‘हरित गोवा’ चे ध्येय साध्य करण्यासाठी राज्य सरकारने एक मोठे पाऊल उचलले आहे. ‘जागतिक पर्यावरण दिना’चे औचित्य साधत मुख्यमंत्री डॉ. प्रमोद सावंत यांनी पणजी येथे आयोजित एका भव्य समारंभात राज्यव्यापी ‘ग्रीन गोवा-क्लीन गोवा’ अभियानाचा शंखनाद केला. या वर्षीच्या अभियानाची संकल्पना (Theme) ‘निसर्गापासून प्रेरित: हवामानासाठी, आमच्या भविष्यासाठी’ अशी ठेवण्यात आली आहे. या अभियानांतर्गत राज्य सरकार आगामी ९० दिवसांत (५ जून ते ५ सप्टेंबर दरम्यान) संपूर्ण राज्यात सुमारे १० लाख झाडे लावणार आहे.

महामार्गावर साकारणार ‘ग्रीन कॉरिडोअर’

मिळालेल्या माहितीनुसार, या अभियानांतर्गत पत्रादेवी ते पोलेम दरम्यानच्या राष्ट्रीय महामार्ग ६६ (NH66) कॉरिडोअरच्या बाजूने सघन वृक्षारोपण केले जाईल, ज्यामुळे येत्या काळात एक भव्य आणि निसर्गरम्य ‘ग्रीन कॉरिडोअर’ विकसित होईल. या कार्यक्रमादरम्यान मुख्यमंत्र्यांच्या हस्ते ‘गोवा राज्य प्रदूषण नियंत्रण मंडळा’चा वार्षिक अहवाल २०२५-२०२६ आणि ‘गोव्याचे कृषीनायक’ या पुस्तकाचे प्रकाशनही करण्यात आले.

कचरा व्यवस्थापनासाठी सामंजस्य करार

पर्यावरण संरक्षणाच्या दृष्टीने एक मोठे पाऊल उचलत ‘गोवा राज्य प्रदूषण नियंत्रण मंडळ’ (GSPCB), ‘गोवा वेस्ट मॅनेजमेंट कॉर्पोरेशन’ (GWMC) आणि ‘काकोरा सरकारी औद्योगिक प्रशिक्षण संस्था’ (ITI) यांच्यात एका सामंजस्य करारावर (MoU) स्वाक्षरी करण्यात आली. या अंतर्गत ‘ड्युअल सिस्टम ऑफ ट्रेनिंग’च्या माध्यमातून ‘वेस्ट मॅनेजमेंट टेक्निशियन’ हा नवा कोर्स सुरू केला जाणार आहे. कचरा व्यवस्थापन क्षेत्रात कौशल्य आणि क्षमता वाढवणे हा यामागचा मुख्य उद्देश आहे.
कार्यक्रमप्रसंगी बोलताना मुख्यमंत्री प्रमोद सावंत म्हणाले,

“हे केवळ वृक्षारोपण नसून आपल्या भविष्याचा पाया आहे. जेव्हा लोक १० लाख झाडे लावण्याबद्दल ऐकतात, तेव्हा त्यांना हे केवळ एक सामान्य अभियान वाटते. परंतु, हे त्याहूनही खूप मोठे आहे. गोव्याचे भविष्य आज आपण घेत असलेल्या निर्णयांवर अवलंबून आहे. मी प्रत्येक नागरिकाला आवाहन करतो की, त्यांनी किमान एक झाड लावावे, त्याचे संगोपन करावे आणि त्याचे रक्षण करावे; कारण पर्यावरणाची जबाबदारी आपल्या सर्वांची आहे.”

पंतप्रधानांच्या ‘एक पेड माँ के नाम’ मोहिमेवरून प्रेरणा

पंतप्रधान नरेंद्र मोदी यांच्या ‘एक पेड माँ के नाम’ या मोहिमेतून प्रेरणा घेत मुख्यमंत्र्यांनी जनतेला यात मोठ्या संख्येने सहभागी होण्याचे आवाहन केले. तसेच, विविध उद्योग आणि कंपन्यांना त्यांच्या सीएसआर (CSR) निधीच्या माध्यमातून या मोहिमेत योगदान देण्यास प्रोत्साहित केले. त्यांनी माहिती दिली की, गोव्याचा सुमारे ६८ टक्के भाग हा हिरवाईने नटलेला आहे, ज्यामध्ये २५ पाणथळ जागा (Wetlands) आणि १६८ जलस्रोत आहेत. सरकार वृक्षारोपण, खाजण जमिनीची पुनर्रचना, शाश्वत वाहतूक आणि वैज्ञानिक कचरा व्यवस्थापनावर सातत्याने भर देत आहे.
मुख्यमंत्र्यांनी स्पष्ट केले की, गोव्याचे शाश्वत भविष्य सुनिश्चित करण्यासाठी पर्यावरण संवर्धन आणि विकास दोन्ही सोबत चालणे आवश्यक आहे. जैवविविधता संरक्षण, कचरा व्यवस्थापन आणि पर्यावरणीय पुनरुज्जीवनासाठी सातत्याने काम केल्याबद्दल त्यांनी पर्यावरण आणि हवामान बदल विभाग, गोवा राज्य प्रदूषण नियंत्रण मंडळ आणि संबंधित यंत्रणांचे कौतुक केले. अक्षय ऊर्जा आणि शाश्वत वाहतूक क्षेत्रातील गोव्याच्या प्रगतीचा उल्लेख करत ते म्हणाले की, गोवा हे पर्यावरण प्रशासन आणि हवामान जबाबदारीचे एक मजबूत मॉडेल म्हणून उदयास येत आहे.

पुरस्कारांचे वितरण

या विशेष प्रसंगी पोस्टर स्पर्धा, पर्यावरण प्रश्नमंजुषा (Quiz), इको शेफ चॅम्पियनशिप आणि फोटोग्राफी स्पर्धेतील विजेत्यांना पुरस्कार प्रदान करण्यात आले. तसेच उद्योग आणि शासकीय विभागांना पर्यावरण क्षेत्रातील उत्कृष्ट कामगिरीसाठी गौरविण्यात आले. कार्यक्रमात ‘गोवा राज्य जैवविविधता मंडळा’चे पुरस्कारही प्रदान करण्यात आले, ज्यामध्ये शाश्वत शेतीतील महत्त्वपूर्ण योगदानाबद्दल प्रगतशील शेतकरी अक्षय पुरके आणि अमिता नाईक यांचा विशेष सत्कार करण्यात आला.

मान्यवरांची उपस्थिती

या सोहळ्याला राज्यसभा खासदार सदानंद शेट तानावडे; महसूल, श्रम आणि रोजगार तसेच कचरा व्यवस्थापन मंत्री आतानासियो मॉन्सेरेट; गोवा सरकारचे मुख्य सचिव डॉ. व्ही. कंडावेलू (IAS); कुंभारजुवे मतदारसंघाचे आमदार राजेश फळदेसाई; पणजी महानगरपालिकेचे महापौर रोहित मॉन्सेरेट; सेंट क्रूझ मतदारसंघाचे आमदार रुडॉल्फ फर्नांडिस; पर्यावरण आणि हवामान बदल विभागाचे संचालक सचिन एस. देसाई; सरप्रीत सिंग गिल (IAS); गोवा राज्य प्रदूषण नियंत्रण मंडळाचे अध्यक्ष डॉ. लेविन्सन जे. मार्टिन्स (IAS); हरीश अडकोणकर; गोवा राज्य प्रदूषण नियंत्रण मंडळाच्या सदस्य सचिव डॉ. गीता नागवेकर; गोवा राज्य जैवविविधता मंडळाचे सदस्य सचिव डॉ. प्रदीप सरमोकदम आणि प्रधान मुख्य अभियंता संदीप चोडणकर उपस्थित होते. यासोबतच वरिष्ठ शासकीय अधिकारी, पर्यावरणतज्ज्ञ, विद्यार्थी, शेतकरी आणि नागरिक मोठ्या संख्येने उपस्थित होते.