नांदेड ३० डिसेंबर (प्रतिनिधी) माधव वाघमारे
नांदेड वाघाळा महानगरपालिका निवडणुकीच्या पार्श्वभूमीवर काँग्रेस पक्ष स्वबळावर निवडणूक लढविण्याच्या तयारीत असून महाविकास आघाडीतील घटक पक्ष तसेच वंचित, रासपा यांच्यासोबत जागावाटपाबाबत चर्चा अंतिम टप्प्यात असल्याची माहिती काँग्रेसचे खासदार प्रा. रवींद्र चव्हाण यांनी दिली. मंगळवारपर्यंत अंतिम निर्णय होईल व काँग्रेसची उमेदवारांची यादी उद्या जाहीर करण्यात येईल, असेही त्यांनी स्पष्ट केले.
आज नांदेड येथे काँग्रेसचे माजी प्रदेशाध्यक्ष तथा नांदेडचे निरीक्षक माणिकराव ठाकरे दाखल झाले होते. काँग्रेस कमिटी कार्यालयात पत्रकार परिषद आयोजित करण्यात आली होती; मात्र बैठका सुरू असल्याने माणिकराव ठाकरे उपस्थित राहू शकले नाहीत. त्याऐवजी खा. प्रा. रवींद्र चव्हाण यांनी पत्रकारांशी संवाद साधला. त्यांनी सांगितले की, माणिकराव ठाकरे हे शिवसेना (उद्धव बाळासाहेब ठाकरे), वंचित बहुजन आघाडी, रासपा व इतर पक्षांच्या पदाधिकाऱ्यांशी चर्चा करत आहेत. निवडणुकीत सेक्युलर मतांचे विभाजन होऊ नये, हा काँग्रेसचा प्रमुख उद्देश आहे.
महाविकास आघाडीच्या बैठकीत जागावाटपावर सखोल चर्चा सुरू असून काँग्रेसकडे ८१ जागांवर सक्षम उमेदवार उपलब्ध आहेत, असे खा. चव्हाण यांनी सांगितले. एमआयएममध्ये प्रवेश केलेल्या काही माजी नगरसेवकांच्या प्रभागांमध्येही काँग्रेसकडून इच्छुक उमेदवार मोठ्या संख्येने पुढे येत आहेत. एमआयएममध्ये गेलेले माजी नगरसेवक हे मनाने काँग्रेस नेते अशोकराव चव्हाण यांच्या संपर्कात होते, असा दावा त्यांनी केला.
तसेच अशोकराव चव्हाण यांच्या शिवाजीनगर येथील निवासस्थानी मध्यरात्री काही पदाधिकाऱ्यांच्या भेटी झाल्याचा व्हिडिओ समाजमाध्यमांवर व्हायरल झाल्याचा उल्लेख करत, “तो व्हिडिओ आणखी काही वेळ शूट झाला असता तर आणखी काही चेहरे समोर आले असते,” असा आरोप खा. चव्हाण यांनी केला. भाजपमध्ये गेलेले काही नगरसेवक तसेच माजी महापौर सध्या काँग्रेसच्या संपर्कात असल्याचाही दावा त्यांनी केला.
उमेदवारांची निवड गुणवत्तेच्या आधारावर केली जाईल, असे स्पष्ट करताना खा. चव्हाण यांनी राष्ट्रवादी काँग्रेस (अजित पवार गट) आणि शिवसेना (शिंदे गट) यांच्यासोबत कोणतीही युती करण्याचा प्रश्न नसल्याचे ठामपणे सांगितले.
या वेळी खासदार रवींद्र चव्हाण, माजी आमदार हणमंत पाटील बेटमोगरेकर, राजेश पावडे, प्रा. यशपाल भिंगे, डॉ. दिनेश निखाते, अब्दुल हाफिज, बालाजी चव्हाण, डॉ. करुणा जमदाडे, डॉ. रेखा चव्हाण यांच्यासह काँग्रेसचे अनेक पदाधिकारी उपस्थित होते.
