नांदेड ७ जानेवारी (प्रतिनिधी) माधव वाघमारे
नांदेड | शहरातील प्रभाग क्रमांक ०५, भाग्य नगर येथे राष्ट्रवादी काँग्रेस पार्टी (अजित पवार गट) च्या मध्यवर्ती प्रचार कार्यालयाचा भव्य शुभारंभ आज मोठ्या उत्साहात पार पडला. आमदार प्रतापराव पाटील चिखलीकर यांच्या शुभहस्ते या कार्यालयाचे उद्घाटन करण्यात आले. यावेळी पक्षाच्या वरिष्ठ नेत्यांची उपस्थिती आणि कार्यकर्त्यांचा उत्स्फूर्त प्रतिसाद पाहायला मिळाला.
पवार टी हाऊस, भाग्य नगर कमानीसमोर सुरू करण्यात आलेले हे प्रचार कार्यालय आगामी महापालिका निवडणुकीच्या पार्श्वभूमीवर पक्षाच्या प्रचाराची मुख्य धुरा सांभाळणार आहे. या कार्यालयातून मतदारांशी थेट संवाद, प्रचाराचे नियोजन, बैठकांचे आयोजन व कार्यकर्त्यांचे समन्वयित कामकाज केले जाणार आहे.
या प्रसंगी प्रभागातील उमेदवार व प्रमुख पदाधिकारी उपस्थित होते. प्रभाग ०५ मधून डॉ. भिमराव बाबुराव काकर्ते (सर्वसाधारण पुरुष), सौ. नेहा गोविंद यादव (ओबीसी महिला), सौ. नजमा साहेबराव (नंदू पाटील) (सर्वसाधारण महिला) तसेच डॉ. जमीर पठाण मालीपटेल (सर्वसाधारण पुरुष) हे उमेदवार जनतेच्या प्रश्नांसाठी सज्ज असल्याचा निर्धार यावेळी व्यक्त करण्यात आला.
७ जानेवारी रोजी दुपारी ४.१५ वाजता पार पडलेल्या या शुभारंभ सोहळ्याने प्रभागात राजकीय वातावरण तापले असून, राष्ट्रवादी काँग्रेस (अजित पवार गट) विकास, पारदर्शकता व जनहिताच्या मुद्द्यांवर निवडणूक लढवणार असल्याचे संकेत यावेळी देण्यात आले. कार्यकर्त्यांमध्ये नवचैतन्य निर्माण झाले असून, प्रभाग ०५ मध्ये प्रभावी प्रचाराची सुरुवात झाल्याचे चित्र दिसून येत आहे.
