भाग्यनगर गुन्हे शोध पथकाची धडाकेबाज कारवाई

नांदेड १८ मार्च (प्रतिनिधी माधव वाघमारे)
शहरातील शिव रोडवरील एका ढाब्यावर जुन्या वादातून तलवारीने जीवघेणा हल्ला करणाऱ्या पाच सराईत आरोपींना भाग्यनगर पोलिसांनी अवघ्या काही तासात बेड्या ठोकल्या आहेत. या कारवाईत पोलिसांनी गुन्ह्यात वापरलेल्या दोन तलवारी आणि तीन मोटारसायकली असा एकूण २ लाख ३० हजार रुपयांचा मुद्देमाल जप्त केला आहे.
मिळालेल्या माहितीनुसार, १२ मार्च २०२६ रोजी रात्री १०:०० वाजताच्या सुमारास शिव रोडवरील ‘विराट ढाबा’ येथे जुन्या भांडणाच्या कारणावरून बेकायदेशीर मंडळी जमली होती. आरोपींनी फिर्यादी विशाल ढगे यांच्यावर तलवार आणि खंजीरने प्राणघातक हल्ला केला. या हल्ल्यात विशाल यांच्या डोक्यात, खांद्यावर, डोळ्यावर आणि पायावर गंभीर दुखापत झाली. या घटनेनंतर परिसरात भीतीचे वातावरण पसरले होते.
घटनेचे गांभीर्य ओळखून नांदेडचे पोलीस अधीक्षक मा. श्री. अबिनाश कुमार यांनी आरोपींना तात्काळ अटक करण्याचे आदेश दिले होते. अप्पर पोलीस अधीक्षक अर्चना पाटील व अप्पर पोलीस अधीक्षक सुरज गुरव यांच्या मार्गदर्शनाखाली भाग्यनगर पोलीस ठाण्याचे पोलीस निरीक्षक संतोष तांबे व गुन्हे शोध पथकाचे सहायक पोलीस उपनिरीक्षक नरेश वाडेवाले यांच्या पथकाने तपासचक्र फिरवले.
अटक करण्यात आलेले आरोपी
१. वैभव सिद्धार्थ कांबळे (वय २१ वर्ष, रा. सिंचन नगर, नांदेड)
२. राहुल दिगंबर भुसारे (वय २९ वर्ष, रा. झरी, जि. परभणी ह.मु. नांदेड)
३. योगेश दिगंबर भुसारे (वय २७ वर्ष, रा. परभणी ह.मु. नांदेड)
४. शुभम मोहन नायके (वय २४ वर्ष, रा. तुळशीराम नगर, नांदेड)
५. अनंत बजरंग ईबितदार (वय १९ वर्ष, रा. सिंचन नगर, नांदेड)
व सोबतच एका विधीसंघर्षग्रस्त बालकाला ताब्यात घेण्यात आले आहे.
मुद्देमाल जप्त आणि पुढील तपास
पोलिसांनी आरोपींकडून गुन्ह्यात वापरलेल्या दोन लोखंडी तलवारी आणि तीन दुचाकी (किंमत २,३०,०००/- रुपये) जप्त केल्या आहेत. या प्रकरणातील एक आरोपी तुलसीदास धर्माजी अंबुरे हा सध्या फरार असून पोलीस त्याचा कसून शोध घेत आहेत.
या यशस्वी कामगिरीबद्दल पोलीस अधीक्षक अबिनाश कुमार यांनी तपास पथकातील अधिकारी व अंमलदारांचे कौतुक केले आहे. या प्रकरणाचा पुढील तपास पोलीस उपनिरीक्षक नरेश वाडेवाले करत आहे