नांदेड मध्ये खूनाच्या गुन्ह्यातील फरार आरोपीला एल सी बी कडून बेड्या गुरुजी चौक परिसरातून मिर्झा शब्बर बेगला अटक

नांदेड ४ ऑगस्ट (प्रतिनिधी: माधव वाघमारे)

नांदेड शहरात घडलेल्या एका गंभीर खून प्रकरणातील गेल्या दीड महिन्यापासून फरार असलेल्या आरोपीला जेरबंद करण्यात स्थानिक गुन्हे शाखेला (LCB) यश आले आहे. मिर्झा शब्बर बेग मिर्झा गफार बेग (वय ४२ वर्ष, रा. खडकपुरा, नांदेड) असे अटक करण्यात आलेल्या फरार आरोपीचे नाव आहे.

नेमकी घटना काय घडली होती?

दिनांक २१ जून २०२६ रोजी रात्री सुमारे २.०५ ते २.१० वाजेच्या दरम्यान बरकतपुरा-वाघी रोडवरील अबरार फंक्शन हॉलजवळ शेख शमीम शेख इसाक हे त्यांच्या मित्रासोबत बसलेले होते. यावेळी दोन मोटरसायकलवरून आलेल्या चार अज्ञात इसमांनी त्यांच्यावर प्राणघातक हल्ला चढवला. आरोपींनी प्रथम गोळीबार केला आणि त्यानंतर तलवार व खंजिराने सपासप वार करून शेख शमीम यांना गंभीर जखमी केले. उपचारादरम्यान त्यांचा मृत्यू झाला होता.

याप्रकरणी वजिराबाद पोलीस ठाण्यात गु.र.नं. ३०२/२०२६ अन्वये भारतीय न्याय संहिता कलम १०३(१), ३(५) सह शस्त्र अधिनियम ३/२५, ४/२५ व ७/२५ नुसार गुन्हा नोंदवण्यात आला होता.

गोपनीय माहिती अन् तांत्रिक तपासाच्या आधारे कारवाई

पोलीस अधीक्षक मा. डॉ. नीलाभ रोहन यांच्या आदेशानुसार नांदेड जिल्ह्यातील गंभीर गुन्ह्यांतील फरार आरोपींचा शोध घेण्यासाठी स्थानिक गुन्हे शाखेकडून विशेष मोहीम राबवली जात आहे.

दिनांक ३ ऑगस्ट २०२६ रोजी पोउपनि महेश कोरे हे आपल्या पथकासह भाग्यानगर पोलीस ठाण्याच्या हद्दीत गस्त घालत असताना, त्यांना गोपनीय माहिती व तांत्रिक विश्लेषणावरून समजले की, सदर गुन्ह्यातील फरार आरोपी मिर्झा शब्बर बेग हा गुरुजी चौक परिसरात आला आहे. प्राप्त माहितीची खातरजमा करून स्थानिक गुन्हे शाखेच्या पथकाने तत्काळ घटनास्थळी जाऊन आरोपीस ताब्यात घेतले. चौकशीदरम्यान त्याने आपली ओळख कबूल केली तसेच वजिराबाद पोलीस ठाण्यातील खूनाच्या गुन्ह्यात फरार असल्याची कबुली दिली.

दीड महिन्यापासून बदलत होता ठिकाणे

सदर आरोपी गेल्या दीड महिन्यापासून पोलिसांना चकवा देण्यासाठी सतत आपली राहण्याची ठिकाणे बदलत होता. मात्र, स्थानिक गुन्हे शाखेने गोपनीय माहितीचे अचूक विश्लेषण करून त्याच्या मुसक्या आवळल्या. पुढील कायदेशीर कारवाईसाठी आरोपीला वजिराबाद पोलिसांच्या स्वाधीन करण्यात आले आहे.

इतर नागरिकांना आवाहन

सदर आरोपीविरुद्ध अन्य कोणाची तक्रार, माहिती किंवा पुरावे असल्यास त्यांनी तात्काळ वजिराबाद पोलीस ठाणे किंवा नांदेड जिल्हा पोलिसांशी संपर्क साधावा, असे आवाहन पोलीस प्रशासनाकडून करण्यात आले आहे.

कारवाई करणारे पथक:

ही उल्लेखनीय कारवाई पोलीस अधीक्षक मा. डॉ. नीलाभ रोहन, पोलीस उपअधीक्षक रामेश्वर वैजने (नांदेड शहर) यांच्या मार्गदर्शनाखाली पोनि/ अतुल भोसले, सपोनि/ विठ्ठल घोगरे, सपोनि/ गोविंद खैरे, पोउपनि/ महेश कोरे व पोलीस अंमलदार श्रीराम दासरे, संघरत्न गायकवाड, मनोज राठोड, महेश बडगु, सुधाकर देवकते (सर्व रा. स्थानिक गुन्हे शाखा, नांदेड), तसेच राजीव बोधगीरे, गणेश यादव, ज्ञानेश्वर कलंदर, गोविंद राठोड (सर्व रा. खंडणी विरोधी पथक) आणि रेश्मा पठाण, राजेंद्र सिटीकर, दीपक ओढणे (सर्व रा. सायबर सेल) यांनी यशस्वीरीत्या पार पाडली.