(प्रतिनिधी माधव वाघमारे) १८ सप्टेंबर नांदेड जिल्ह्यात अवैध धंद्यांविरुद्ध पोलीस अधीक्षक मा. डॉ. नीलाभ रोहन यांच्या मार्गदर्शनाखाली विशेष मोहीम राबवली जात आहे. या मोहिमेअंतर्गत धर्माबाद पोलीस स्टेशन पथक आणि स्थानिक गुन्हे शाखा (स्थागुशा), नांदेड यांनी धर्माबाद शहरात दोन वेगवेगळ्या ठिकाणी छापे टाकून बेकायदेशीर ऑनलाईन व मटका जुगार अड्ड्यांचा पर्दाफाश केला आहे. या कारवाईत एकूण ५ आरोपींना ताब्यात घेण्यात आले असून त्यांच्याकडून ८१,७७० रुपयांचा मुद्देमाल जप्त करण्यात आला आहे.
पहिली कारवाई (चुंगी नाका परिसर): दिनांक १६ सप्टेंबर २०२६ रोजी चुंगी नाका भागातील एका दुकानात संगणकावर ‘ऑनलाईन राजश्री लॉटरी’ नावाचा बेकायदेशीर जुगार सुरू असल्याची गुप्त माहिती स्थानिक गुन्हे शाखेला मिळाली. पोलिसांनी तातडीने छापा मारून आरोपी महंमद असिफ पि. महंमद अन्वर (वय ३८, रा. सरस्वतीनगर, धर्माबाद), संतोष नागोजी पबतवार (वय ४२, रा. बाळापुर, धर्माबाद) आणि साईनाथ उर्फ अंजु बालेमवार (रा. देवीगल्ली, धर्माबाद) यांना ताब्यात घेतले. त्यांच्याकडून संगणक, प्रिंटर, रोकड व जुगाराचे साहित्य असा एकूण ७०,३७० रुपयांचा मुद्देमाल जप्त करण्यात आला. या प्रकरणी धर्माबाद पोलीस ठाण्यात गु.र.क्र. २२५/२०२६ नुसार गुन्हा दाखल करण्यात आला आहे.
दूसरी कारवाई (रामनगर परिसर): दुसऱ्या घटनेत रामनगर भागातील मोकळ्या जागेत ‘श्रीदेवी, मेन बाजार, कल्याण, कल्याण नाईट’ नावाचा मटका जुगार चालवला जात असल्याची गुप्त माहिती धर्माबाद पोलीस स्टेशनच्या प्रभारी अधिकाऱ्यांना मिळाली. पोलिसांनी घटनास्थळी धाड टाकून अजय उर्फ राजू गंगाधर गाजेवार (रा. सहारा कॉलनी, धर्माबाद) व शेख सज्ज (रा. बिलोली) यांना ताब्यात घेतले. त्यांच्याकडून एक मोबाईल फोन, रोकड व मटका साहित्य असा ११,४०० रुपयांचा मुद्देमाल जप्त करण्यात आला. याप्रकरणी गु.र.क्र. २२६/२०२६ अन्वये गुन्हा नोंदवण्यात आला आहे.
सदर दोन्ही कारवाया पोलीस अधीक्षक मा. डॉ. नीलाभ रोहन यांच्या आदेशाने, पोलीस निरीक्षक गणेश चव्हाण यांच्या मार्गदर्शनाखाली पोलीस उपनिरीक्षक तुकडे स पो उपनि दारासिंग राठोड पोलीस अंमलदार कुमरे, सय्यद अलिम, हाक्के, पिंगलवाड आणि चाटे यांच्या पथकाने पार पाडली. नागरिकांनी आपल्या परिसरातील बेकायदेशीर हालचालींची माहिती पोलिसांना देऊन सहकार्य करावे, असे आवाहन नांदेड जिल्हा पोलिसांकडून करण्यात आले आहे.
