नांदेड दिनांक २५ ऑक्टोंबर
नांदेड शहरात अवैध अंमली पदार्थांची वाहतूक व विक्री करणाऱ्यांविरुद्ध पोलीस अधीक्षक मा. डॉ. नीलाहम रोहन यांच्या आदेशानुसार सुरू असलेल्या विशेष मोहिमेत, पोलीस अधीक्षक कार्यालयातील ‘स्ट्रीट सेफ्टी पथक’ आणि ‘भाग्यनगर पोलीस ठाण्याच्या गुन्हे शोध पथकाने’ संयुक्त कारवाई करत जय भवानी चौक परिसरातून तब्बल २ लाख ३५ हजार ५०० रुपये किमतीचा ४.७१० किलोग्राम ओला गांजा जप्त केला आहे. या प्रकरणी दोन आरोपींना रंगेहात अटक करण्यात आली असून त्यांच्याविरुद्ध भाग्यनगर पोलीस ठाण्यात एन.डी.पी.एस. (NDPS) कायद्यान्वये गुन्हा दाखल करण्यात आला आहे.
कारवाईची पार्श्वभूमी आणि तपशील
दिनांक २४/१०/२०२६ च्या रात्री भाग्यनगर पोलीस ठाण्याच्या हद्दीत गुन्हे शोध पथकाचे पोलीस उपनिरीक्षक विनोद देशमुख हे आपल्या पथкаसह पेट्रोलिंग ड्युटीवर होते. दरम्यान, २५ ऑक्टोबर २०२६ रोजी पहाटेच्या सुमारास पोलीस अधीक्षक कार्यालयातील स्ट्रीट सेफ्टी पथकाचे प्रमुख सपोनि/नृसिंह पोमनाळकर यांनी माहिती दिली की, जय भवानी चौक, नांदेड येथे दोन संशयित इसम चोर्‍या व विक्रीच्या उद्देशाने बेकायदेशीररीत्या गांजाच्या झाडाच्या फांद्यांची मोळी घेऊन जात असताना दिसून येत आहेत.
मिळालेल्या गोपनीय माहितीच्या आधारे मा. डॉ. नीलाहम रोहन, पोलीस अधीक्षक, नांदेड यांच्याकडून कायदेशीर कारवाईची परवानगी घेण्यात आली. त्यानंतर मा. रामेश्वर वेन्जने, उप विभागीय पोलीस अधिकारी, नांदेड शहर आणि भाग्यनगर पोलीस ठाण्याचे पोलीस निरीक्षक संतोष तांबे यांच्या मार्गदर्शनाखाली अंमली पदार्थ विरोधी कायद्यातील (NDPS Act) तरतुदींचे काटेकोर पालन करत, पहाटेच्या वेळी शासकीय व खाजगी पंच, इलेक्ट्रॉनिक वजन काटेवाले, फोटोग्राफर आणि फॉरेन्सिक टीम यांना पाचारण करण्यात आले.
राजपत्रित अधिकारी म्हणून पोलीस निरीक्षक संतोष तांबे यांच्या उपस्थितीत आणि पंचांच्या समक्ष ताब्यातील इसम:
- तुकाराम रुस्तुमराव पावडे (वय ५० वर्षे, व्यवसाय: शेती, रा. वाडी बु., ता. जि. नांदेड)
- रुक्मण नरसिंग वायवळे (वय ५१ वर्षे, व्यवसाय: मजुरी, रा. इंदिरानगर, नवी वाडी, नांदेड)
यांना एन.डी.पी.एस. कायद्यातील तरतुदीनुसार हक्कांची रीतसर लेखी व तोंडी समज देऊन त्यांची झडती घेण्यात आली.
मुद्माल जप्त व गुन्हा दाखल
झडती दरम्यान आरोपींच्या ताब्यात उग्र वास येणारी व हिरवी ओलसर पाने असलेली गांजाच्या झाडाच्या फांद्यांची पांढऱ्या दोरीने बांधलेली मोळी आढळून आली. फॉरेन्सिक टीमने तपासणी करून तो अंमली पदार्थ ‘गांजा’ असल्याचे खात्री केल्याने सदर मुद्देमाल ४ किलो ७१० ग्रॅम (प्रति किलो ५०,०००/- रुपये दराप्रमाणे) एकूण किंमत २,३५,५००/- रुपयांचा सदर मुद्देमाल जागीच लाखमोहर (सील) करून पंचनाम्याद्वारे जप्त करण्यात आला.
प्राथमिक चौकशीत आरोपी तुकाराम पावडे याने कबुली दिली की, त्याने व त्याच्या सोबतच्या रुक्मण वायवळे यांनी मिळून स्वतःच्या आर्थिक फायद्यासाठी पावडे याच्या प्लॉटिंगमधील गांजाच्या झाडाच्या फांद्या तोडून त्या चोरून-लपवून विकण्यासाठी नेत होते. या प्रकरणी पोउपनि/विनोद देशमुख यांनी सरकारतर्फे दिलेल्या फिर्यादीवरून भाग्यनगर पोलीस ठाण्यात दोन्ही आरोपीविरुद्ध गु.र.नं. ६१८/२०२६ कलम ८(क), २०(ब)(ii)(ब) आणि २९ एन.डी.पी.एस. (NDPS) ॲक्ट प्रमाणे गुन्हा नोंदवण्यात आला आहे.
पोलीस पथकाची उल्लेखनीय कामगिरी
सदरची यशस्वी कामगिरी पोलीस अधीक्षक मा. डॉ. नीलाहम रोहन, अप्पर पोलीस अधीक्षक मा. सुरज गुरव व पोलीस उप अधीक्षक मा. रामेश्वर वेन्जने यांच्या मार्गदर्शनाखाली भाग्यनगर पोलीस ठाण्यातील पोलीस निरीक्षक संतोष तांबे, पोउपनि विनोद देशमुख व पोलीस अंमलदार चवरे, बसमतकर, कांबळे, बालाजी चन्ने, मुंडे, गवाले आणि कांबळे तसेच स्ट्रीट सेफ्टी पथक येथील सपोनि नृसिंह पोमनाळकर व पोलीस अंमलदार अमलापुरे, हाक्के यांनी संयुक्तपणे पार पाडली आहे.
प्रतिनिधी: माधव वाघमारे
