विशेष प्रतिनिधी (माधव वाघमारे)
नांदेड १४ नोव्हेंबर नांदेड जिल्ह्यात अवैध गौण खनिज उत्खनन व वाहतुकीस प्रतिबंध घालण्यासाठी पोलीस अधीक्षक मा. डॉ. नीलाभ रोहन यांच्या आदेशानुसार सुरू असलेल्या विशेष मोहिमेत मुदखेड पोलिसांनी मोठी कारवाई केली आहे. गौण खनिजाचे बेकायदेशीर उत्खनन आणि विनापरवाना वाहतूक विरोधात दोन स्वतंत्र कारवायांमध्ये एकूण ४८,३५,००० रुपये किमतीचा मुद्देमाल जप्त करण्यात आला असून, याप्रकरणी ४ आरोपींविरुद्ध गुन्हे दाखल करण्यात आले आहेत.
पहिली कारवाई: मुगट पाटी रोडवर ८.१० लाखांचा मुद्देमाल जप्त
प्रभारी अधिकारी मुदखेड पोलीस स्टेशन यांना मिळालेल्या गोपनीय माहितीनुसार, मुगट पाटी रोडवर एक टिपर वाहनामध्ये अवैधरीत्या रेतीची वाहतूक होत होती. या माहितीच्या आधारे पोलीस पथकाने घटनास्थळी जाऊन एमएच-२६ एडी-२३१५ क्रमांकाच्या संशयित वाहनाची पाहणी केली असता, त्यात अंदाजे २ ब्रास रेती आढळून आली. संबंधitaंकडे रेती वाहतुकीची कोणतीही अधिकृत कागदपत्रे वा परवानगी नसल्याने ती अनधिकृत असल्याचे निष्पन्न झाले.
पोलिसांनी पंचासमक्ष सदर वाहन (किंमत ८,००,००० रुपये) आणि रेती (किंमत १०,००,००० रुपये) असा एकूण ८,१०,००० रुपये किमतीचा मुद्देमाल जप्त केला. या प्रकरणी आरोपी १. विठ्ठल भुंजराव बोचरे (वय ४० वर्षे, रा. पाथर्डा, ता. मुदखेड) आणि वाहन मालक यांच्याविरुद्ध मुदखेड पोलीस ठाण्यात गुन्हा रजि. क्र. २४३/२०२६, कलम ३०३(२), ३(५) भारतीय न्याय संहिता, २०२३ सह कलम ४८(७), (८) महाराष्ट्र जमीन महसूल अधिनियम अन्वये गुन्हा दाखल करण्यात आला आहे.
दुसरी कारवाई: महाटी ते माळकौठा जाणाऱ्या रोडवर ४०.२५ लाखांचा मुद्देमाल जप्त
दुसऱ्या कारवाईत, महाटी ते माळकौठा जाणाऱ्या रोडवर एका संशयित वाहनाची (क्र. एमएच-२६ एडी-१९१८) तपासणी करण्यात आली. वाहनामध्ये अंदाजे ५ ब्रास रेती विनापरवाना वाहतूक केली जात असल्याचे निदर्शनास आले.
या कारवाईत पोलिसांनी वाहन (किंमत ४०,००,००० रुपये) व रेती (किंमत २५,००० रुपये) असा एकूण ४०,२५,००० रुपये किमतीचा मुद्देमाल जप्त केला. याप्रकरणी आरोपी १. संभाजी एकनाथ पवार (वय ३२ वर्षे, रा. आमदूरा, ता. मुदखेड) आणि वाहन मालक यांच्याविरुद्ध मुदखेड पोलीस ठाण्यात गुन्हा रजि. क्र. २४५/२०२६, कलम ३०३(२), ३(५) भारतीय न्याय संहिता, २०२३ सह कलम ४८(७), (८) महाराष्ट्र जमीन महसूल अधिनियम अन्वये गुन्हा दाखल करण्यात आला आहे.
पोलीस प्रशासनाचा इशारा व नागरिकांना आवाहन
नांदेड जिल्ह्यात अवैध गौण खनिज उत्खनन, रेती चोरी आणि विनापरवाना वाहतूक करणाऱ्या व्यक्तींविरुद्ध कठोर कायदेशीर कारवाई सतत सुरू राहणार असल्याचे प्रशासनाकडून स्पष्ट करण्यात आले आहे.
ही यशस्वी कारवाई पोलीस अधीक्षक मा. डॉ. नीलाभ रोहन, अपर पोलीस अधीक्षक मा. संदीप जाधव यांच्या मार्गदर्शनखाली पोनि/गणेश कराड, पोउपनि/रमेश पुणेबोईनवाड, सुरेश जाधव, पोलीस अंमलदार चक्रधर, शिंदे, सुकनवार (सर्व नेमणूक मुदखेड) यांनी पार पाडली आहे.
दरम्यान, गोदावरी नदीपात्रात किंवा इतर ठिकाणी अवैध रेती उत्खनन, वाहतूक किंवा गौण खनिज चोरी होत असल्याचे तसेच बेकायदेशीर शस्त्र बाळगल्याची माहिती मिळाल्यास नागरिकांनी तात्काळ जवळील पोलीस ठाण्यास किंवा पोलीस नियंत्रण कक्षास माहिती देऊन सहकार्य करावे, असे आवाहन जनसंपर्क अधिकारी, पोलीस अधीक्षक कार्यालय, नांदेड (आशिष सिताराम बोराटे) यांनी केले आहे.
