प्रतिनिधी : माधव वाघमारे (२१ ऑगस्ट)
नांदेड जिल्ह्यातील कायदा, शांतता व सुव्यवस्था अबाधित राखण्यासाठी तसेच जिल्ह्यातील बेकायदेशीर व अवैध धंद्यांचे समूळ उच्चाटन करण्याच्या उद्देशाने नांदेड जिल्हा पोलीस दलातर्फे एकाच दिवशी संपूर्ण जिल्हाभरात विशेष ‘मास रेड’ (Mass Raid) मोहीम राबवण्यात आली. या धडक कारवाईमुळे जिल्ह्यातील अवैध व्यावसायिकांचे धाबे दणाणले आहेत.
पोलीस अधीक्षक डॉ. नीलाभ रोहन यांच्या नेतृत्वात व मार्गदर्शनाखाली जिल्ह्यातील सर्व उपविभागीय पोलीस अधिकारी, सर्व पोलीस ठाण्यांची पथके, दुय्यम पोलीस अधिकारी आणि अमलबजावणी पथकांनी शहरी तसेच ग्रामीण भागात एकाच वेळी धाडी टाकून ही कारवाई केली.
या मोहिमेदरम्यान जिल्ह्यातील संशयित अड्डे, हातभट्ट्या, देशी-विदेशी दारूची बेकायदेशीर विक्री, मटका, जुगार अड्डे आणि प्रतिबंधित गुटखा साठ्यांवर अचानक छापे टाकण्यात आले. या कारवाईत रोख रक्कम, वाहने, गुटखा साठा, जुगाराचे साहित्य व दारू असा एकूण २० लाख ५८ हजार १८२ रुपयांचा मुद्देमाल जप्त करण्यात आला आहे. या प्रकरणी महाराष्ट्र दारूबंदी कायदा, महाराष्ट्र जुगार प्रतिबंधक कायदा व अन्न सुरक्षा मानके कायद्यान्वये गुन्हे नोंदवण्यात आले आहेत.
कारवाईचा सविस्तर तपशील: कारवाईचा प्रकारदाखल गुन्हेआरोपीजप्त मुद्देमाल (₹) दारूबंदी कायदा३९४०१,४५,२८०/- मटका / जुगार०८३९११,४७,११०/- प्रतिबंधित गुटखा०२०३७,६५,७९२/- एकूण४९८२२०,५८,१८२/-
नागरिकांना पोलीस प्रशासनाचे आवाहन: आपल्या परिसरात अवैध दारू, जुगार, मटका, अमली पदार्थ (ड्रग्ज) किंवा बंदी असलेला गुटखा विक्री यांसारखे बेकायदेशीर प्रकार सुरू असल्यास तात्काळ जवळच्या पोलीस ठाण्याशी किंवा पोलीस नियंत्रण कक्षाशी संपर्क साधावा, असे आवाहन पोलीस प्रशासनाकडून करण्यात आले आहे. माहिती देणाऱ्या नागरिकांचे नाव व ओळख पूर्णपणे गुप्त ठेवली जाईल तसेच यापुढेही अवैध धंद्यांविरोधात अशीच कठोर कारवाई सुरू राहील, असा इशारा देण्यात आला आहे.
