२५ ऑगस्ट प्रतिनिधी: माधव वाघमारे
नांदेड शहर व परिसरात वाढत्या सोनसाखळी चोरी आणि घरफोडीच्या घटनांना आळा घालण्यासाठी स्थानिक गुन्हे शाखेने (LCB) धडक कारवाई केली असून एका सराईत आरोपीला रंगेहात पकडण्यात यश मिळवले आहे. या कारवाईत तब्बल १ लाख ७५ हजार रुपयांचा मुद्देमाल हस्तगत करण्यात आला असून दोन मोठे गुन्हे उघडकीस आले आहेत.
मामा चौक परिसरात सापळा अन् थरारक पाठलाग पोलीस अधीक्षक डॉ. नीलाभ रोहन यांच्या आदेशानुसार जिल्ह्यात विशेष मोहीम राबवली जात आहे. दिनांक २४ ऑगस्ट २०२६ रोजी स्थानिक गुन्हे शाखेचे पोलीस उपनिरीक्षक मिलिंद सोनकांबळे यांच्या पथकाला कौठा परिसरातील मामा चौक येथे एक व्यक्ती चोरीचे सोन्याचे दागिने विक्री करण्यासाठी दुचाकीवर येणार असल्याची गुप्त माहिती मिळाली होती. त्यानुसार पोलिसांनी मामा चौक परिसरात सापळा रचला. दुपारच्या सुमारास संशयित व्यक्ती तिथे आली, मात्र पोलिसांची चाहूल लागताच त्याने दुचाकी तिथेच टाकून पळून जाण्याचा प्रयत्न केला. पोलिसांनी शिताफीने पाठलाग करत त्याला ताब्यात घेतले. मोहम्मद आफताब उर्फ अद्यु पि. अब्दुल खदीर (वय २२ वर्षे, रा. मोमीनपुरा हतई, इतवारा, नांदेड) असे या आरोपीचे नाव आहे.
उघडकीस आलेले गुन्हे आणि जप्त मुद्देमाल
- भाग्यनगर पोलीस ठाणे (गु.र.नं. १०७/२०२६): आरोपी मोहम्मद आफताबने त्याचा साथीदार लखन उर्फ आकाश उर्फ लक्ष्मण देवकर (रा. भोकर, जि. नांदेड) याच्या मदतीने २६ फेब्रुवारी २०२६ रोजी रात्रीच्या सुमारास जय भवानी नगर भागात एका महिलेच्या गळ्यातील सोन्याची चैन जबरीने हिसकावून नेली होती. त्याच्याकडून ९ ग्रॅम वजनाची आणि अंदाजे १ लाख ३५ हजार रुपये किमतीची सोन्याची चैन तसेच गुन्ह्यात वापरलेली ४० हजार रुपयांची दुचाकी (MH-26-CJ-4129) जप्त करण्यात आली आहे.
- अर्धापूर पोलीस ठाणे (गु.र.नं. १५५/२०२६): याव्यतिरिक्त, आरोपीने आपले इतर साथीदार अब्दुल उस्मान अब्दुल समी आणि शेख मोबीन शेख गौस यांच्या मदतीने अर्धापूर येथील दुर्गानगर भागातील एका बंद घराचा कडी-कोयंडा तोडून घरफोडी केल्याची कबुली प्राथमिक चौकशीत दिली आहे.
आरोपीकडून एकूण १,७५,००० रुपयांचा मुद्देमाल हस्तगत करण्यात आला असून त्याला पुढील कायदेशीर कारवाईसाठी भाग्यनगर पोलिसांच्या स्वाधीन करण्यात आले आहे. तसेच त्याच्या फरार साथीदारांचा पथकाद्वारे शोध सुरू आहे.
ही धडक कारवाई पोलीस अधीक्षक डॉ. नीलाभ रोहन, अपर पोलीस अधीक्षक (भोकर) श्रीमती अर्चना पाटील, आणि अपर पोलीस अधीक्षक (नांदेड) सुरज गुरव यांच्या मार्गदर्शनाखाली पार पडली. स्थानिक गुन्हे शाखेचे पोलीस निरीक्षक अतुल भोसले यांच्या नेतृत्वात पो.उप.नि. मिलिंद सोनकांबळे, रवि बामने, चंद्रकांत स्वामी, अझहर शेख आणि अनिल बिरादार यांच्या पथकाने ही कामगिरी यशस्वी केली.
