प्रतिनिधी २१ ऑगस्ट (माधव वाघमारे)
नांदेड जलसंधारण दिनाचे औचित्य साधून माती आणि पाण्याच्या संवर्धनाचा महत्त्वपूर्ण संदेश जनमानसात पोहोचवण्यासाठी नांदेड शहरात आयोजित करण्यात आलेल्या ‘वॉक फॉर वॉटर’ या महावॉकथॉनला नांदेडकरांचा प्रचंड आणि उत्स्फूर्त प्रतिसाद लाभला. मृद व जलसंधारण विभागाच्या पुढाकारातून या विशेष जनजागृती उपक्रमाचे आयोजन करण्यात आले होते.
येथील शासकीय तंत्रनिकेतन मैदानापासून ३ किलोमीटरच्या या महावॉकथॉनचा प्रारंभ झाला. या रॅलीमध्ये लोकप्रतिनिधी, विविध शाळा-महाविद्यालयांचे विद्यार्थी, नागरिक, शासकीय अधिकारी, कर्मचारी, पत्रकार तसेच मोठ्या संख्येने जलसंधारणप्रेमी एकत्र आले होते. याप्रसंगी सहभागी झालेल्या नागरिकांनी ‘माती वाचवा – पाणी वाचवा – सुरक्षित भविष्य घडवा’ अशा निसर्गपूरक घोषणा देत संपूर्ण परिसर दुमदुमून टाकला.
वाढते नागरीकरण आणि हवामान बदलाच्या काळात मृदा व जलसंधारणाची गरज अधोरेखित करणे हा या महावॉकथॉनचा मुख्य उद्देश होता. जलसंधारणाच्या कार्यात केवळ शासकीय यंत्रणा पुरेशी नसून सर्वसामान्य नागरिकांचा सहभाग अत्यंत महत्त्वाचा आहे, हा संदेश या उपक्रमातून अत्यंत प्रभावीपणे देण्यात आला.
मृद व जलसंधारण विभागाच्या वतीने आयोजित या महावॉकथॉनमुळे नांदेड शहरात पर्यावरण आणि पाणी बचतीबाबत एक नवी चेतना निर्माण झाली असून, भविष्यात जलसंधारणासाठी लोकसहभाग अधिक वाढेल असा विश्वास आयोजकांनी व्यक्त केला.
