नांदेड दि. ६ नोव्हेंबर –(प्रतिनिधी) माधव वाघमारे शहरातील सार्वजनिक ठिकाणी गुन्हेगारी वातावरण रोखण्यासाठी नांदेड पोलिसांनी पुन्हा एकदा आक्रमक मोड दाखवला आहे. नवी सिटी स्ट्रीट सेफ्टी ड्राईव्ह मोहिम राबवत रस्त्यावरून फिरणाऱ्या विनानंबर, विनापरवाना तसेच सार्वजनिक शांतता भंग करणाऱ्यांवर थेट धडक कारवाई पोलिस पथकांकडून सुरू करण्यात आली आहे.
याबाबत पोलीस अधीक्षक कार्यालयातून प्रसिद्ध झालेल्या निवेदनानुसार, ५ नोव्हेंबर रोजी शहरातील विविध भागात पथकांनी अचानक तपासणी मोहिमा राबवून मोठ्या प्रमाणावर दंड आकारणी व नोंद घेण्याची प्रक्रिया केली.
कोणकोणत्या भागात धडक तपासणी?
भाग्यनगर पोलीस स्टेशन हद्दीत – ११० / ११७ कलमान्वये वाहने जप्त, विनानंबर दोनचाकी व वाहनमालकांवर दंड कारवाई. दुकानं, वाईन शॉप व हॉटेलांवर तपासणी.
वजीराबाद पोलीस स्टेशन– फेन्सी नंबर प्लेट लावणाऱ्या वाहनचालकांवर कारवाई. विनानंबर मोटारसायकल जप्त.
विमानतळ पोलीस स्टेशन हद्दीत – पेट्रोलिंगदरम्यान परिसरातील हॉटेल, ढाबे, वाईन शॉपवर थेट तपासणी. ८५(१) कलमांतर्गत गुन्हे नोंद.
शिवाजी नगर – रेस्ट हाऊस परिसरात तपासणी मोहिम. विद्यार्थ्यांची गर्दी असणाऱ्या ठिकाणांवर विशेष लक्ष.
शिवाजी पुतळा चौक, भाग, बस स्टँड परिसर – रात्रौ उशिरापर्यंत फिरणाऱ्या व संशयास्पद वाहनांवर कारवाई.
पोलिसांचा स्पष्ट इशारा
कारवाई केवळ एकदिवशी नव्हे तर पुढील काळातही अशाच पद्धतीने कायम सुरु राहणार असल्याचे पोलिसांनी स्पष्ट केले आहे. सार्वजनिक स्थळांचा गैरवापर, दारू पिऊन शांतता भंग करणे, विनानंबर वाहने चालवणे किंवा नियम तोडणे आढळल्यास दंडासोबत गुन्हा दाखल करण्याची तयारी पोलिसांकडे पूर्ण आहे.
नागरिकांना आवाहन
पोलिस प्रशासनाकडून सर्व नागरिकांना वाहतूक नियमांचे काटेकोर पालन करण्याचे आवाहन करण्यात आले आहे. कोणतीही संशयास्पद व्यक्ती/वाहन अथवा शांतता भंग करणारी कृती दिसल्यास संबंधित विभागाला तातडीने माहिती देण्याची विनंतीही करण्यात आली आहे.
नांदेड शहरातील रस्ते अधिक सुरक्षित ठेवण्यासाठी पोलिसांचा हा कडक मोड; नियम मोडणाऱ्यांना पुढील दिवसांत अजून मोठ्या कारवाईला सामोरे जावे लागू शकते..
